Almatyda urlanǵan kólik quraldaryn bólshektep satýmen ainalysqan top ustaldy, dep habarlaidy QazAqparat.
Qalalyq kriminaldy politsiia qyzmetkerleri atalǵan qylmysqa qatysty buryn buzaqylyq jasaǵany úshin sottalǵan Jambyl oblysynyń 26 jastaǵy turǵynyn jáne osyǵan deiin eki ret sotty bolǵan 25 jastaǵy er adamdy ustady.
Olardy quryqtamas buryn tártip saqshylary kúdiktilerdiń árqaisysynyń atqaratyn qylmystyq áreketin arnaiy operatsiia barysynda zerdelep, urlanǵan kólik quraldaryn bólshektep satýǵa jaýapty adamdy anyqtady.
«Atalǵan qylmystyq top alty adamnan quralǵan. Olardyń úlkenderiniń jasy 47-de bolsa, eń jas kúdikti 25-te. Bulardyń barlyǵy ońai jolmen paida tabýdy kózdegen. Dálirek aitqanda, eki kúdikti ózderin qala bazarlarynyń birinde qosalqy bólshekter satýmen ainalysatyn jeke kásipker retinde tanystyrǵan. Alaida olardyń saýda núktelerinde tek qana urlanǵan kólik quraldarynyń qosalqy bólshekteri ǵana saýdalanǵan», – dedi Almaty qalasy PD kriminaldyq politsiia basqarmasynyń bastyǵy Qýatbek Naýatov.
Tergeý barysynda kúdiktilerdiń 10 kólik quralyn urlaǵany belgili boldy. Olar kóbine eski úlgidegi BMW, Lada, Nissan, Audi, Volkswagen kólikterin qoldy etip otyrǵan.
«Qazirgi tańda úsh avtokólik tolyǵymen anyqtalsa, qalǵan jeti kóliktiń qaida jasyrylǵany anyqtalyp jatyr. Ustalǵandardyń sózinshe, olar kólikterdi kórshiles oblystarǵa aparyp úlgergen. Kúdiktiler qamaýǵa alyndy. Tergeý amaldary jalǵasýda», – dep atap ótti politsiia ókili.
