Foto: Tengrinews.kz/Álihan Sariev
Almatyda Kók bazardyń 200-ge jýyq satýshysy jalǵa alyp otyrǵan oryndarynyń úsh ese qymbattaýyna bailanysty narazylyǵyn bildirdi, - dep habarlaidy Tengrinews.kz agenttigi.
Jalǵa alyp otyrǵan satýshylardyń sózinshe, buǵan deiin olar sharshy metrine bes myń teńge tólegen bolsa, endi bul soma 15 myń teńgege kóterilip ketken. Bazar ákimshiligi jańa ereje 1 qarashadan bastap kúshine enetinin aitypty-mys.
"Keshe basshylyqtyń baǵa kóteriletini týraly qaýlysy shyqqany habarlandy. Iaǵni olar bizben kezdespedi, ony tólei alamyz ba, álde joq pa aqyldasqan da joq. Árine, tólei almaimyz, sebebi barlyq satýshynyń otbasy bar, basqa da shyǵyndary bar. Buryn 100 myń tólep júrsek, endi 300 myń tólemekpiz. Al qazir saýda azaiyp ketse, ondai somany qaidan alamyz? Jańa baǵa jalǵa berý sharttaryna sáikes kelmeidi", - deidi satýshylardyń biri.
Ol ózge áriptesterimen birge 3-4 jyl buryn ashylǵan jańa pavilonda jumys isteidi. Satýshylardyń sózinshe, buǵan deiin jalǵa berý quny ózgermegen.
Al bazar ákimshiligi jalǵa berý quny ózgergeni týraly eshqandai habarlama bolmaǵanyn alǵa tartty. Olardyń sózinshe, Kók bazar burynǵy baǵa boiynsha jumys istep tur.
"Eshkimge jalǵa berý quny ósti degen áńgime aitylǵan joq. Jýrnalisterdi shaqyryp, jaidan-jai mundai nárse uiymdastyrýǵa bolmaidy ǵoi. Men eshkimge ol týraly aitqan emespin. Jańa pavilonda ekinshi qabatynda sharshy metri bes myń teńgeden. Al eski pavilonda - 15 myń teńge. Osy baǵa saqtalady. Eshkimge qaǵaz túrinde eskertý jasalǵan joq", - deidi Kók bazar ákimshiliginiń ókili Stella Karapetian.
