Almaty qalasynyń bas sanitar dárigeriniń sheshimimen búginnen bastap qaladaǵy halyqqa qyzmet kórsetý ortalyqtary ashyldy, dep habarlaidy QazAqparat.
«Almatylyqtar HQO-da elektrondy formatta qoljetimsiz, «qaǵaz» júzindegi qyzmetterdi ǵana ala alady. Bul shamamen 100 memlekettik qyzmet, olardy alý úshin HQO-ǵa barý qajet. Sondai-aq, HQO-dan egov.kz portaly arqyly onlain túrde rásimdelgen qyzmetterdiń daiyn nátijesin alýǵa bolady. Memlekettik qyzmet kórsetýdiń jańa formatyna kóshýge bailanysty nysandar epidemiiaǵa qarsy barlyq sanitariialyq rejimdi qatań saqtaý, áleýmettik qashyqtyq jáne adamdar aǵynyn retteý sekildi sharalardy saqtai otyryp jumys isteýde», - deidi «Azamattarǵa arnalǵan úkimet» memlekettik korporatsiiasy Almaty qalasy filialynyń direktory Daniiar Qyryqbaev.
Osylaisha, qalada 16 front-ofis, 5 – mamandandyrylǵan HQO, 2 – Migratsiialyq, 2– Tsifrlyq qyzmet kórsetý ortalyqtary ashyldy. 1600-den astam qyzmetker jumysqa shyqty. Onyń ishinde klienttermen tikelei bailanysta jumys isteitin 933 front-ofis mamany bar. Jumys ýaqyty dúisenbi men senbi aralyǵynda, tańǵy saǵat 9.00-den 18.00-ge deiin. Aldyn ala jazylýsyz HQO-larda eshqandai qyzmet kórsetilmeidi. HQO-ǵa barý úshin kezek ýaqytyn 1414 bailanys ortalyǵy nemese nemese egov.kz portalyndaǵy arnaiy servis arqyly aldyn ala brondaý qajet bolady.
«Qalǵan, elektrondy formatqa aýdarylǵan jáne egov.kz portalynda qoljetimdi barlyq memlekettik qyzmettiń 80%-dan astamyn tek ózdiginen nemese ákimdikter janyndaǵy keńselerde, oqý oryndarynda, meditsinalyq uiymdarda, ekinshi deńgeidegi bankterde, jumyspen qamtý jáne áleýmettik baǵdarlamalar bólimderinde, «Nur Otan» partiiasy keńselerinde, saýda ortalyqtarynda, avtosalondarda, jáne t.b. oryndardaǵy ózine-ózi qyzmet kórsetý sektorlarynan ala alady. Bul azamattardyń HQO-da kóptep jinalýyn boldyrmaidy jáne virýsty juqtyrý qaýpin joiady», - deidi filial direktory Daniiar Qyryqbaev.
Búgingi tańda, Almaty qalasy filialy úiden shyqpai-aq memlekettik qyzmetterdi elektrondyq formatta alýǵa múmkindigi joq adamdarǵa 40-qa jýyq eGov buryshy daiyndaldy.
Zeinetkerler, kópbalaly otbasylar men múgedekter úshin ár front-ofiste jeńildik terezesi jumys isteidi. Olar da HQO-ǵa baratyn ýaqytyn aldyn ala brondaýy kerek.
«HQO-ǵa tek maskamen kirgiziledi. Ǵimarattyń aldynda kelýshilerdiń áleýmettik qashyqtyqty saqtaý úshin arnaiy tańbalar syzylǵan. Koronavirýs infektsiiasyn juqtyrý qaýpi áli joiylǵan joq, bul sharalardyń barlyǵy almatylyqtardyń qaýipsizdigin qamtamasyz etý úshin qabyldanǵan», – dep qortyndylady Daniiar Qyryqbaev.
