2020 jyldyń 12-16 aqpan kúnderi «Arman» kinoteatry men Qazaqstannyń kinosynshylar qaýymdastyǵy halyqaralyq kinofestivalderden oryn alǵan filmderdi kórsetedi. Olardyń ishinde Mádeniet jáne sport ministrliginiń tapsyrysymen Sh.Aimanov atyndaǵy «Qazaqfilm» túsirgen tórt kartina bar, dep habarlaidy "Ult aqparat" kinokompaniianyń baspasóz qyzmetine silteme jasap.
13 aqpanda kórermender Ábish Kekilbaevtyń povesi jelisi negizinde rejisser Jańabek Jetirýov túsirgen «Shyńyraý» filmin kórsetedi. Filmde Eńsep esimdi keiipkerdiń qudyq qazý týraly oqiǵasy baiandalyp, baqtalastyq, maqtanysh, mahabbat, dostyq, satqyndyq syndy ómir oqiǵalary baiandalady.
Ótken jyldyń basynda Dakkada (Bangladesh) ótken 17-shi Halyqaralyq kinofestivalde kinorejisser Rivkat Ibragimovtyń bul filmdegi jumysy Aziia kinofestivalinde úzdik dep tanyldy. Sonymen qatar, Jetirýovtyń atalmysh kartinasy «Fadjr» halyqaralyq kinofestivaline (Iran), 28-shi «Altyn qoraz ben jeti tús» kinofestivaline (Qytai), AQSh-ta ótken Asian International Film Festival Arizona festivaline, Jaipýrda (Úndistan) ótken 2-shi Kaariat halyqaralyq kinofestivaline qatysqan.
14 aqpanda kórermenge Aziz Zairov pen Muhamed Mamyrbekov atty rejisserlerdiń birlese túsirgen «Qyz ben teńiz» áleýmettik dramasy usynylady. Kartina tserebraldy sal aýrýy diagnozymen ómir súretin Ásel esimdi qyzdyń kúrdeli taǵdyry, onyń armandary, mahabbat jáne otbasy týraly baian etedi.
Búgingi tańda film birneshe halyqaralyq kinofestivalderge qatysyp úlgergen. Film kelesi marapattarǵa ie boldy: «Úzdik aktrisa úshin» syilyǵy (Dinara Sháripova), Romford kinofestivali (London, Ulybritaniia), qoǵam qairatkeri Karine Habirovanyń «Áleýmettik jáne motivatsiialyq kino» nominatsiiasyndaǵy arnaiy syilyǵy jáne Bashqurtstan Respýblikasy Otbasy jáne eńbek ministrliginiń «Armandy júzege asyrǵany úshin» arnaiy syilyǵy (akter Tahir Ýmarov), IV Halyqaralyq «Kúmis Aqbýzat» kinofestivali (Ýfa, Resei), «Barselona» Aziialyq kinofestivaliniń «Panorama» bólimindegi «Úzdik film» syilyǵy (Barselona, Ispaniia).
15 aqpanda almatylyqtar 41-shi Máskeý halyqaralyq kinofestivalinde qazaqstandyq kino tarihynda tuńǵysh ret Gran-pri jeńip alǵan Farhat Sháripovtyń «Jeke jetilý treningi» filmin kóre alady. Sondai-aq, kartina XV «Eýraziia» halyqaralyq kinofestivalinde Gran-prige ie bolǵan.
Filmniń álemdik tanystyrylymy 2018 jyly 23-shi Býsan halyqaralyq kinofestivalinde «Aziia kinoteatryndaǵy tereze» konkýrstyq baǵdarlamasynda ótti. Sol jyly film Almatyda ótken 14-shi Sháken Aimanov atyndaǵy halyqaralyq kinofestivalde týyndy qazylar alqasynyń arnaiy syilyǵy men NETPAC syilyǵyn ielendi.
«Jeke jetilý treningi» filmi 40 jastaǵy bank qyzmetkeri Qanat orta jastaǵy ómirlik daǵdarysty bastan keshirý oqiǵasyn kórsetip, onyń uzaq ýaqyt boiy eshteńe armandap kórmegeni jáne ómirden eshteńe kútpeitinin baiandaidy. Ózin jáne kózqarasyn ózgertý áreketi kezinde basty keiipker ózin-ózi damytý jattyǵýlaryn baryp, munda áigili jattyqtyrýshy kóshbasshylyq pen sáttilik qupiialaryn bólisedi. Alaida. burynnan tanys Daniiardy kezdestirgende, Qanattyń taǵdyry kenetten ózgeredi.
Kórermen osy kúnderi «Qazaqfilm» kinostýdiiasynyń basqa da filmderin tamashalai alady.
16 aqpanda Emir Baiǵazinniń «Ózen» kartinasy trilogiiasynyń úshinshi, iaǵni qorytyndy bólimi kórsetiledi. Film órkenietten ada qalǵan aǵaiyndar týraly, olardyń qalaǵa kelgennen keiingi ómirlik ózgeristerin pash etedi.
«Ózen» filminiń álemdik premerasy 75-shi Venetsiialyq kinofestivaldiń «Kókjiekter» baǵdarlamasynda bolyp, Emir Baiǵazin «Úzdik rejisser» syilyǵymen marapattaldy. Soltústikamerikalyq premera Torontodaǵy halyqaralyq festivalde ótken edi. Kartina sonymen qatar «Platforma» konkýrstyq baǵdarlamasyna usynylyp, tóreshilerdiń nazaryna ilinip qana qoimai, Screen Daily reitinginde birinshi orynǵa ie boldy. Arada bir ai ótkennen keiin «Ózen» 12-shi «Asia Pacific Screen Awards» keshinde «Rejissýra jetistigi» nominatsiiasyna ilindi. «Ózenniń» aziialyq tanystyrylymy Tokio kinofestivalinde boldy. Los-Anjelestegi «Asian World Film Festival»-da «Ózen» tóreshilerdiń syilyǵyn iemdendi. Sonymen qatar, Emir Baiǵazinniń kartinasy Portýgaliiadaǵy LEFFEST kinofestivalinde bas júldeni enshiledi.
