Búgin Almaty óńirlik kommýnikatsiialar qyzmetiniń alańynda shomylý maýsymyndaǵy qaýipsizdik sharalary týraly onlain brifing ótti, dep habarlaidy QazAqparat.
Almatyda karantin merziminde ózen-kólderde shomylýǵa tyiym salynady.
Bul týraly Almaty qalasy TJD Azamattyq qorǵanys basqarmasynyń aǵa ofitseri, maior Bekbolat Buǵabaev aitty.
«Almaty aýmaǵy boiynsha 28 shaǵyn ózen aǵady, 26 sý qoimasy bar. Qala ákiminiń 2019 jylǵy 9 shildedegi bekitilgen qaýlysy boiynsha sonyń 4-inde ǵana shomylýǵa ruqsat etilgen. Olar - Sairan kóliniń batys bóligi Tólebi kóshesinen ońtústikke qarai 200 metr aralyq, Sairan kóliniń shyǵys bóligi Tólebi kóshesinen ońtústikke qarai 200 metr qashyqtyq, D.Qonaev atyndaǵy ÚAK boiynda ornalasqan Baým toǵaiy jaǵajaiynda, D.Qonaev atyndaǵy ÚAK boiynda ornalasqan «Gúlder» demalys aimaǵynda shomylýǵa ruqsat etilgen», - dedi Bekbolat Buǵabaev.
Mamannyń aitýynsha, karantin aiaqtalǵansha bul sý qoimalarynda shomylýǵa ruqsat joq.
«QR Bas memlekettik sanitarlyq dárigeriniń 2020 jylǵy 10 mamyrdaǵy №36 buiryǵyna sáikes karantin jalǵasyp jatkandyǵyn atap ótken jón. Sondyqtan, ázirshe shomylýǵa ruqsat joq», -dedi B.Buǵabaev.
Departament ókili atalǵan sý qoimalarynan bólek jerlerde shomylǵan adamdar ákimshilik jazaǵa tartylatynyn aitty.
«Osy jerlerden bólek sý qoimalarynda, taý ózenderinde shomylǵan adamdarǵa birinshi ret eskertý jasalady. Ol eskertý bazaǵa tirkeledi, ekinshi ret sol adam qaita shomylsa, 2 AEK mólsherinde, iaǵni 5556 teńge aiyppul tóleidi», - dedi spiker.
