Almaty oblysy taýlaryn mekendeitin qar barysyn túsirýge arnalǵan fototuzaqty urlaǵan týrist kamerany qaitaryp berdi, dep habarlaidy QazAqparat.
«Biylǵy jyly qyzyq oqiǵa boldy. Biz Snow Leopard Foundation qory jáne zoologiia institýtymen birlesip Ile Alataý ulttyq parkinde qar barysyn túsiretin fototuzaqtar ornattyq. Biz eki qurylǵyny bir jerge qoidyq. Taýǵa shyqqan týrist bireýin ózimen alyp ketti. Ol ekinshisin kórmegen. Sol ekinshi kamera týristi qyrynan túsirip alypty. Sol sýret arqyly fototuzaqty qoldy etken týristi taýyp aldyq», - deidi Almaty memlekettik tabiǵi qoryǵynyń aǵa ǵylymi qyzmetkeri Saltóre Saparbaev.
Onyń aitýynsha, kamera 1-2 kún ishinde qaitaryldy. Bul fototuzaqta erekshe kadrlar bolǵan.
«Kameraǵa túngi Almatynyń kórinisinde qar barysy taýǵa qarai bet alyp bara jatqan sýreti túsip qalǵan. Bul endi tańǵajaiyp sýret», - dep qosty ol.
Sondai-aq, ol osy jyldyń kókteminde fototuzaq úsh qar barysyn jaqyn qashyqtyqta túsirip alǵanyn aitty.
«Almaty memlekettik tabiǵi qoryǵynyń aýmaǵynda ornalasqan Talǵar shatqalynda men eki alańyn qasyna ertken qar barysyn kórdim. Basynda men olardy bir shaqyrym qashyqtyqta kórdim, keiin olarǵa bildirtpei jaqyndap 10 metr qashyqtyqta baqyladym», - dedi Saparbaev.
Onyń aitýynsha, qazir sirek kezdesetin qar barysy joǵalyp ketý qaýpi tóngen janýarlar tiziminen shyǵaryldy. Búginde brakonerlerge qarsy baǵdarlama men fototuzaq kameralarynyń arqasynda olardyń sany arta bastady.
