Foto ashyq derekkózden alyndy
Almaty qalasy Bostandyq aýdanynyń №2 aýdandyq sotynda azaptaý faktisi boiynsha politsiia qyzmetkerlerine qatysty qylmystyq is qaraldy, dep habarlaidy QazAqparat agenttigi.
Sot ótken jyldyń qańtar aiyndaǵy jappai tártipsizdikter kezinde avtokólikti zańsyz iemdendi degen kúdiktiniń politsiia bólimshesine jetkizilgenin anyqtady.
Onda eki politsiia qyzmetkeri kúdiktini tártipsizdikterge qatysty dep eseptep, zardap shekken áriptesteri úshin kek alamyz degen maqsatpen oǵan fizikalyq qysym kórsetip, kúsh qoldanyp, azaptaǵan.
Sotta habarlaǵandai, atalmysh áreketter úshin qylmystyq kodekste belgili bir laýazymdardy atqarý quqyǵynan aiyra otyryp, 3 jyldan 7 jylǵa deiingi merzimge bas bostandyǵynan aiyrý túrindegi jaza qarastyrylǵan.
Sondai-aq úsh politsiia qyzmetkeri qylmystyq quqyqbuzýshylyq jasaǵanyn basshylyqtan jasyrǵan.
Qylmystyq kodekste quqyq qorǵaý organynyń qyzmetkeri bola otyryp, qyzmette áreketsizdik jasaǵany úshin úsh jylǵa deiin bas bostandyǵynan aiyrý jazasy kózdelgen.
Sot sottalýshynyń birine jaza taǵaiyndaý kezinde múliktik zalaldy jáne moraldyq ziiandy erikti túrde óteýin jazany jeńildetetin mán-jailar dep tanydy. Al tótenshe jaǵdaida qylmystyq quqyqbuzýshylyq jasaýyn jáne onyń bergen antyn buzýyn jazany aýyrlatatyn mán-jailar retinde tanydy.
Ekinshi sottalýshyǵa jaza taǵaiyndaý kezinde jas balalarynyń bolýyn, múliktik zalal men moraldyq ziiandy óteýin jazany jeńildetetin mán-jailar retinde qarastyrsa, tótenshe jaǵdaida qylmystyq quqyqbuzýshylyq jasaǵany jáne onyń bergen antyn buzǵan áreketterin jazany aýyrlatatyn mán-jailar retinde eskerdi.
Úshinshi sottalýshyǵa jaza taǵaiyndaý kezinde tótenshe jaǵdaida qylmystyq quqyqbuzýshylyq jasaǵany jáne antyn buzǵan áreketterin jazany aýyrlatatyn mán-jailar retinde tanydy.
«Sot úkimimen eki sottalýshy Qylmystyq kodekstiń 1-tarmaǵynyń 146-baby 2-bóligi boiynsha kináli dep tanylyp, úsh jyl merzimge memlekettik qyzmette qyzmet atqarý quqyǵy shektele otyryp, úsh jyl merzimge bas bostandyǵynan aiyrý jazasy taǵaiyndaldy. Úshinshi sottalýshy QK-niń 370-babynyń 2-1-bóligi boiynsha kináli dep tanylyp, memlekettik qyzmette qyzmet atqarý quqyǵynan ómir boiyna aiyryldy. Sondai-aq, oǵan 1 jyl 6 ai merzimge bas bostandyǵyn shekteý túrindegi jaza taǵaiyndaldy. Úkim zańdy kúshine engen joq», - dep habarlady Almaty qalalyq sotynyń baspasóz qyzmetinde.
