COVID-19 virýsyn juqtyrǵan naýqastardy aýrýhanaǵa jatqyzý jáne aýrýdy basqarý modeli aldaǵy jaǵdaidy boljaý jáne aýrýhanaǵa jatqyzý júiesin basqarý úshin jasalǵan, dep habarlaidy QazAqparat.
Almaty qalalyq Qoǵamdyq densaýlyq saqtaý basqarmasynyń málimetinshe, baǵdarlama densaýlyq saqtaý júiesiniń barlyq deńgeiine negizdeledi jáne naýqastardy statsionarlarǵa durys bólýdi kózdeidi. Bul protsestegi negizgi retteýshi jedel meditsinalyq kómek bolyp tabylady, olar shaqyrý túsken soń aýrýdyń aýyrlyq dárejesin anyqtap, eger aýrýdyń jeńil túri bolsa naýqastardy emhanalarǵa jiberip, al infektsiianyń qiyn túri bolǵan jaǵdaida aýrýhanaǵa jatqyzýy kerek.
Qazirgi ýaqytta Almaty qalasynda 6000 tósek-oryn ashylǵan, ony taǵy da 1000 tósek-orynǵa arttyrý josparda bar. Bul rette, aýrýdy basqarý modeline sáikes, densaýlyq saqtaý júiesindegi kollaps kezinde táýligine 500 adam aýrýhanaǵa jatqyzylýy múmkin. Al statsionarlar 70% tolyq bolǵanda qatań shekteý sharalaryn engizý qajettiligi týyndaidy.
«6000 tósek-oryn bolǵandyqtan bizdiń mindet táýligine aýrýhanaǵa túsetin adamdar sanyn 350-den asyrmaý. Bul óte mańyzdy, óitkeni eger aýrýhanaǵa túsken naýqastar sany kóbeigen kezde ýaqtyly sharalar qabyldanbasa, onda júie quldyraýy (kollaps) múmkin. Iaǵni, aýrýhanaǵa túsetinder sany kúnine 500-ge deiin jetýi múmkin, buǵan biz jol bermeýimiz qajet. Bul statsionarlardaǵy bizdiń áriptesterimiz úshin aýyr júkteme bolmaq jáne tósek-oryn rezervteri de, sheksiz emes», – dep atap ótti Kamaljan Nadyrov.
Statsionarlardyń qabyldaý múmkindigin baqylaý úshin bos tósek-oryn qorynyń turaqty monitoringi jasalady. Sonymen qatar, koronavirýs infektsiiasy bar naýqastarǵa sapaly meditsinalyq kómek kórsetý úshin tósek aýysymy aiyna 3 adam deńgeiinde bolýy kerek.
«Statsionarlar 70% paiyzǵa tolyq bolǵan kezde biz aýrýhanaǵa jatqyzý deńgeiin tómendetýge jáne yńǵaily jaǵdaida jumys isteýge múmkindik beretin qatań shekteý sharalaryn engizýge májbúr bolamyz. Bul statsionarlyq deńgeide sapaly emdeý múmkindigin beredi. Dál osy deńgeide shekteý sharalary yńǵaily, bul degenimiz kásibimizdiń tutastai jabylmaýyna, biraq belgili bir shekteýler jaǵdaiynda jumys isteýimizge múmkindik. Iaǵni, ekonomikalyq belsendilikti qalpyna keltiredi», – deidi qalalyq Qoǵamdyq densaýlyq saqtaý basqarmasynyń basshysy Kamaljan Nadyrov.
