Almatyda Aqparat jáne qoǵamdyq damý ministri Aida Balaevanyń qatysýymen HII Azamattyq forým ótip jatyr, dep habarlaidy "Ult aqparat".
Bul týraly qala ákimi Baqytjan Saǵyntaev Instagram-daǵy paraqshasynda jazdy.
«Almatyda Aqparat jáne qoǵamdyq damý ministri A. Balaevamen HII Azamattyq forýmynyń jumysyn ashtyq. Kún tártibinde — qala aldynda turǵan mindetterdi jergilikti atqarýshy organdardyń azamattyq qoǵammen ózara is-qimyly arqyly sheshý. Onlain sessiia barysynda ekologiia men tsifrlandyrý, densaýlyq saqtaý, bilim berý, áleýmettik qorǵaý, mádeniet pen sport máseleleri talqylanady», – dep jazdy ákim.
Sonymen qatar, Baqytjan Saǵyntaev iAzamat jalpyqalalyq platformasynyń beta-nusqasy búgin iske qosylǵanyn aitty.
«Bastamalardy talqylap, megapolisti damytý boiynsha usynystardy ázirleý úshin tiimdi kommýnikatsiialyq alańdardyń biri retinde iAzamat jalpyqalalyq platformasynyń beta-nusqasy búgin iske qosyldy. Almatylyqtar qaladaǵy jobalarǵa daýys berip, ózekti máselelerdi kóterip, ondaǵy jańalyqtardy bilip otyrady. Jańa interaktivti qural azamattyq qoǵamnyń basqarý jáne sheshim qabyldaý protsesine qatysýyn keńeitedi. Bizdiń árqaisymyz Almatynyń ómirin jaqsartý boiynsha jańa ideialar men usynystardyń bastamashysy bola alamyz», – dep atap ótti shahar basshysy.
