Qyrkúiektiń 5-6 kúni M.Áýezov atyndaǵy Qazaq memlekettik akademiialyq drama teatrynda «FARIZA» spektakliniń premerasy qoiylady, dep habarlaidy "Ult aqparat".
Shynshyl da syrshyl óleńderimen jurttyń júregine jol tapqan, adaldyǵy men aqyndyǵy teń túsetin, qaisar da qaitalanbas talant iesi - Fariza Ońǵarsynovanyń ómiri men óleńi týraly pesany dramatýrg Roza Muqanova jazdy.
«Ol aqyn, jazýshy, shyǵarmashylyq adamy retinde barlyq qurmetke laiyq jan. Biz osy qoiylym arqyly jastarǵa, onyń zamandastaryna, aqynnyń shyǵarmashylyǵyn jaqsy kóretin adamdarǵa astraldi dúnie kórsetkimiz keledi. Biz úshin aqyn Farizany ǵana emes, áieldiń sezimin jetkizý mańyzdy», - dedi ideia avtory jáne jobanyń bas prodiýseri - Ainur Kópbasarova.
Onyń aitýynsha, pesa qazaq tilinde qoiylady, orys tiline ilespe aýdarma jasalady.
«Qazan aiynda osy spektakldi Reseidiń úlken sahnasynda qoiamyz. Qazaqtyń Farizasyn qazaqstandyqtar ǵana emes búkil álem tanysa, bilse deimiz. Bizdiń bul bastamamyzdy QR Resei Federatsiiasyndaǵy Tótenshe jáne Ókiletti Elshisi Imanǵali Nurǵaliuly qoldady, men oǵan rizashylyǵymdy bildirgim keledi», - dep tolyqtyrdy joba avtory.
Basty rólderde - «Daryn» memlekettik syilyǵynyń laýreaty Nazgúl Qarabalina, teatr jáne kino akterleri Qýandyq Qystyqbaev, Leila Beknazar-Haninga jáne Erlan Káribaev.
«Maǵan basty keiipkerdiń rólin oinaý týraly usynys naýryz aiynda Ainurdan tústi. Árine, Fariza apaidy, onyń shyǵarmashylyǵyn biletinmin. Men ony kórdim, biz bir dastarhan basynda da otyrǵanbyz. Ol kisi tik minezdi bolatyn. Biraq eshqashan daiys kóterip qatty sóilemeitin, óte názik jan edi. Ol óz oiyn anyq ári ashyq jetkizetin», - deidi aktrisa.
Qoiylymnyń rejisseri - Farhat Moldaǵali, spektakldi jumbaq ári mistikalyq dep atady, óitkeni olar aqynnyń ishki álemin kórsetýge tyrysqan.
Spektakldegi arnaiy mýzykalyq kompozitsiiany kompozitor Renat Gaisin jazdy.
«Ol Fariza Ońǵarsynovany tanidy, janynda boldy. Sondyqtan bolar, Rinat aqynnyń sezimin, tabiǵatyn mýzyka arqyly jetkize bildi. Ol Muqali Maqataevty kórgen joq. Desekte, bul aqynnyń da jan dúniesin mýzyka arqyly kórsetti. Ol bizdiń zamanymyzdaǵy qazaqtyń eki uly aqynynyń minezin, tabiǵi bolmysyn mýzykanyń kúshimen kórsete bildi», - deidi prodiýser.
Uiymdastyrýshylardyń aitýynsha, qoiylym basqa formatta kórsetiledi. Zamanaýi tehnologiialyq qurylǵylar kómegimen daiyndalǵan videokontent, dybys arqyly áserleý, obrazǵa sai dekoratsiia, sahna kóńil-kúiine sáikes arnaiy jazylǵan mýzyka, saýndtrek, ártisterdiń kiim úlgisiniń talǵammen tigilýi. Munyń bári - kreativti shyǵarmashylyq toptyń kórermenderge daiyndaǵan syiy.
Spektakl 16 jastan asqan kórermenderge arnalǵan. Biletterdi kassa operatorlarynan jáne teatrdan satyp alýǵa bolady.
