Almatylyq politseiler arnaiy is-shara barysynda esirtki jarnamalaǵan er adamdy ustady, dep habarlaidy QazAqparat.
Almaty qalalyq politsiia departamentiniń málimetinshe, ustalǵan Sh esimdi azamat buǵan deiin, iaǵni 2008 jyly esirtki qylmysy úshin sotty bolǵan.
«Jazasyn ótep shyqqan kúdikti eski isin qolǵa alyp, qylmystyq zańnamany buzdy. Ol esirtkini onlain satyp alýǵa bolatyn resýrstarǵa trafarettik jarnamalar salǵan. Kúdikti óz qylmysyn moiyndady. Ol buǵan deiin Áýezov, Alataý jáne Jetisý aýdandarynda ornalasqan ǵimarattarǵa jazý jazǵan. Oǵan jumys istegeni úshin elektrondy ámiian arqyly aqsha tólegen», – deidi departamenttiń esirtki qylmysyna qarsy kúres basqarmasy bastyǵynyń orynbasary Saǵyndyq Aiaǵanov.
Sonymen qatar kúdiktini tekserý barysynda birneshe saittyń mekenjailary jazylǵan trafaretter men boiaýlar tabyldy jáne tárkilendi.
«Onyń is-áreketi QK-tiń 299-1 babymen saralandy. Esirtki quraldaryn, psihotroptyq zattardy nemese olardyń analogtaryn, prekýrsorlaryn nasihattaý nemese zańsyz jarnamalaý – úsh jylǵa deiingi merzimge bas bostandyǵynan aiyrylýy múmkin», - deidi Saǵyndyq Aiaǵanov.
