Foto: Vladimir Severnyidyń Facebook jelisindegi paraqshasynan
Almatyda jýrnalister Vladimir men Nargiz Severnyi ustaldy, - dep habarlaidy "Ult aqparat".
"JShS basshysynyń aryzy boiynsha, jaǵymsyz aqparattardyń jariialanbaýy úshin aqsha bopsalaǵan S. tegindegi erli-zaiypty jýrnalister qarajattyń bir bóligin alý kezinde ustaldy.
Qazirgi tańda atalǵan derektiń tolyq mán-jaiyn anyqtaý úshin jedel-tergeý is-sharalary júrgizilip jatyr. Nátijesinde zańdy protsessýaldyq sheshim qabyldanady", - delingen Almaty qalasy PD baspasóz qyzmetiniń habarlamasynda.
Aita keteiik, buǵan deiin áleýmettik jelide jýrnalisterdiń balalarynyń videoúndeýi taraǵan edi. Olar Vladimir men Nargiz Severnyidyń qaladaǵy saýda úileriniń birinde ustalǵanyn málimdedi.
"Olardy formadaǵy birneshe adam ustady jáne tergeýshiler jeke zattaryn tintip, videoǵa túsirip turdy. Anamdy bizben sóilestirmesten birden bólimshege alyp ketti, ákemdi bizben birge úige jetkennen keiin alyp ketti. Meniń otbasymnyń eshqaisysy olarmen bailanysyp, telefon soǵyp, ne bolyp jatqanyn bile almaidy, óitkeni telefondary tárkilendi", – dedi jýrnalisterdiń uly.
