Foto: AO "NII kardiologii i vnýtrennih boleznei"
Almatylyq kóz dárigerleri jas jigittiń kózine kirgen metall synyǵyn alyp tastap, kózdiń kórý qabiletin saqtap qaldy, dep habarlaidy Kazinform agenttigi.
Ortalyq qalalyq klinikalyq aýrýhananyń qabyldaý bólimine kóz almasynyń jaraqatymen túsken naýqastyń aitýynsha, jihazǵa arnalǵan qurylǵynyń temiri kózine úi jaǵdaiynda kirip ketken.
Oftolmologiia bólimshesiniń meńgerýshisi Gúlzat Abdraimova, mundai jaraqat kóz almasynyń jyrtylýyna, kóz linzasynyń yǵysýyna, katarakta, glaýkoma, kózdiń shyny tárizdes qabatyna qan jinalýy nemese tordyń zaqymdalýyna ákelýi múmkin.
Dárigerler kózdiń ishindegi bógde zatty shyǵaryp alý úshin operatsiia jasady.
«Ota sátti ótti, otadan keiin naýqastyń kórý qabileti tolyqtai saqtaldy. Kózge kirgen artyq zatty alyp tastaǵan soń, biz naýqas kóziniń torly qabatyna lazerlik koagýliatsiia jasadyq. Sebebi, otadan keiin naýqasta kózdiń kórý qabileti tómendep ketý qaýpi boldy», - deidi dáriger.
Ortalyq qalalyq klinikalyq aýrýhanada mundai otany jasaý úshin zamanaýi qurylǵylar bar, olar túrli dárejedegi kóz aýrýyn emdeýde ozyq nátijelerge jetýge múmkindik beredi.
«Kóp jaǵdaida alyp tastaýdy qajet etetin zattar kózge aýyl sharýashylyǵy, qurylys jumystary, aǵashpen jumys isteý kezinde kiredi. Sol sebepten de men jumys isteý barysynda qaýipsizdik erejelerin saqtap, qorǵanysh kózildirigin kiiýdi usynamyn», - dedi oftolmolog.
