Almaty qalasy ákimdiginiń baspasóz ortalyǵynda Bostandyq aýdanynyń ákimi Altai Raqymbetov 2019 jylǵy áleýmettik-ekonomikalyq damý qorytyndylary boiynsha esep berdi, dep habarlaidy "Ult aqparat".
Altai Raqymbetovtiń aitýynsha, Bostandyq aýdanynda 29 714 kásiporyn tirkelgen, onyń ishinde iske qosylyp turǵandary – 17 359. Al basym bóligi kóterme-bólshek saýda – 33% (10700), ǵylymi-tehnikalyq qyzmet – 12% (4500), qurylys - 9% (3150) jáne t. b. salalarda.
Shaǵyn jáne orta biznesti qoldaý men damytý úshin birqatar baǵdarlamalar iske asyrylyp jatyr.
«Biznestiń jol kartasy-2020» biznesti qoldaý jáne damytý memlekettik baǵdarlamasyn iske asyrý barysynda aýdanda jalpy somasy 9,4 mlrd teńgege 17 joba sýbsidiialandy. Memlekettik granttardy óteýsiz negizde usyný boiynsha jalpy somasy 20,7 mln teńgege 14 joba maquldandy. Al «Eńbek» baǵdarlamasy aiasynda aýdan boiynsha jalpy somasy 647,3 mln teńgege 41 shaǵyn nesie berildi»,- deidi Altai Raqymbetov
Ótken jyly Bostandyq aýdanynda kópbalaly otbasylardy qoldaý maqsatynda «Baqytty otbasy» ortalyǵy ashyldy. Sonymen qatar, «Isker ana» jobasy boiynsha 20 kópbalaly anaǵa demeýshilerdiń qoldaýymen, óz biznesin damytýǵa arnalǵan jabdyqtar satyp alyndy.
«Almaty Business-2025» kásipkerlikti damytý aimaqtyq baǵdarlamasy aiasynda «Qolday» kásipkerlik ortalyǵy quryldy. Oǵan ótken jyly 300-den astam kásipker júgindi, jalpy somasy 1,5 mlrd teńge bolatyn jobalar maquldandy»,- deidi aýdan ákimi.
Sonymen qatar, ol áleýmettik qorǵaý sharalarymen 6 209 adamnyń qamtylyp, onyń 4 332-si turaqty jumysqa ornalasqanyn atap ótti.
«Halyqtyń áleýmettik osal toptaryna jatatyn 6 740 adam jalpy somasy 124 mln teńgeden astam áleýmettik tólem aldy. Onyń ishinde, 32,3 mln teńge kóleminde ataýly áleýmettik kómek 641 az qamtylǵan otbasyǵa, iaǵni 2 978 adamǵa berildi»,– dep tolyqtyrdy esep berý barysynda Altai Raqymbetov.
