Almatynyń Alataý jáne Naýryzbai aýdandarynda Oqýshylar sarailary salynyp jatyr. Bul týraly Almaty ákiminiń orynbasary Muhit Ázirbaev onlain brifing barysynda málim etti, dep haarlaidy QazAqparat.
Spikerdiń sózinshe, Almatyda mektepten tys tegin bilim berýmen qamtý áli de tómen.
«Atalǵan máseleni sheshý úshin Alataý jáne Naýryzbai aýdandarynda eki jańa Oqýshylar saraiynyń qurylysy bastaldy. Árqaisysynyń qýaty – 675 adam. Bul nysandar qosymsha bilim berý jáne balalardyń bos ýaqytyn ótkizý baǵdarlamalaryn júzege asyrý úshin qolaily jaǵdai jasaýǵa múmkindik beredi», - dedi ákimniń orynbasary.
Sonymen qatar, ol balabaqshalar men mekteptegi oryn tapshylyǵy máselesin sheshý jumystary belsendi júrip jatqanyn jetkizdi. Biyl biýdjet esebinen Naýryzbai aýdanynyń «Qalqaman-2», Alataý aýdanynyń «Nurkent», «Mádeniet» jáne «Darhan», Túrksib aýdanynyń «Qairat» shaǵyn aýdandarynda bes mekteptiń, sondai-aq №9, 48, 191 úsh mektepke qosalqy ǵimarat salynady.
«Saialy» jáne «Zerdeli» shaǵyn aýdandarynda barlyǵy 1100 oqýshyǵa arnalǵan eki mektep, sondai-aq qalanyń alty mektebine qosalqy qurylys salý josparlanǵan - №59, 112, 148, 103, 65, 97.
«Mektepke deiingi bilim berý nysandary boiynsha Naýryzbai, Alataý, Áýezov, Jetisý jáne Túrksib aýdandarynda toǵyz balabaqshanyń jobalyq-smetalyq qujattamasyn daiyndaý jumystary júrgizilýde. 5 jylǵa deiingi kezeńde mektepter men balabaqshalardaǵy tapshylyqty joiý josparlanýda», - dedi ákimniń orynbasary.
Sondai-aq ol Alataý aýdanynda 14 kortqa arnalǵan tennis ortalyǵynyń qurylysy aiaqtalyp qalǵanyn jetkizdi.
«Alataý aýdanynda 14 kortqa arnalǵan tennis ortalyǵynyń qurylysy aiaqtalýda. Birinshi jartyjyldyqta Alataý, Medeý jáne Túrksib aýdandarynda úsh deneshynyqtyrý-saýyqtyrý kesheni iske qosylady. Olarǵa barý barlyq jas sanattary úshin, onyń ishinde múmkindigi shekteýli azamattar úshin qoljetimdi bolady. Deneshynyqtyrý-saýyqtyrý keshenderinde sanatyna qarai ámbebap sport zaldary, basseinder, trenajer zaldary, kúshtik daiyndyq, boks jáne horeografiia zaldary, ústel tennisine arnalǵan zaldar jáne shahmat klýby bolady», - dedi spiker.
Aita keteiik, Naýryzbai, Áýezov, Almaly jáne Túrksib aýdandarynda taǵy jeti deneshynyqtyrý-saýyqtyrý kesheniniń jobasy ázirlenip jatyr. Olardyń qurylysy jyl sońynda bastalady.
