Qala ákimi Baqytjan Saǵyntaev bilim berý salasy qyzmetkerleriniń forýmynda balalardyń sapaly bilim alýy men bos ýaqyttaryn paidaly ótkizýdi uiymdastyrý sharalary týraly aitty, dep habarlaidy QazAqparat.
«Ótken jyly men Alataý jáne Naýryzbai aýdandarynda mektep oqýshylaryna arnalǵan eki kópsalaly Oqýshylar saraiyn salýdy tapsyrǵan bolatynmyn. Búgingi kúni qurylys úshin jer ýchaskeleri bólindi. Tiisti tehnikalyq qujattama daiyndalyp jatyr. Bul joba memlekettik-jekemenshik áriptestik sheńberinde júzege asyrylady. Kelesi jyly qurylys jumystary bastalady», - dedi ákim.
Sonymen qatar, ol qalada 23 myń balany qamtityn 9 memlekettik mýzykalyq mektep jáne 8 oqýshylar úii bar ekenin atap ótti. Alaida, bul oqýshylar sanynyń nebári 9%-yn quraidy.
«Alǵa qoiylǵan mindetterdi úkimettik emes uiymdarmen birge sheshý úshin 2020-2021 jyldary sport jáne mádeni-kóńil kóterý mekemelerine, mektepten tys qosymsha bilim berý mekemelerine qala balalaryn jappai tartý maqsatynda «Jol kartasy» jasaldy. Ony iske asyrýǵa bilim basqarmasynan ózge, sport, mádeniet, qoǵamdyq damý, qoǵamdyq densaýlyq basqarmalary da tartylatyn bolady», – deidi Baqytjan Saǵyntaev.
Qaladaǵy sport, mádeniet nysandary, jastar ortalyqtary jáne basqa nysandar balalar úshin ashyq ári qoljetimdi bolady.
«Tek sport salasynyń ózinde ǵana Alataý aýdanynda bes deneshynyqtyrý-saýyqtyrý keshenderin, tennis ortalyǵyn, shańǵy tramplininiń halyqaralyq kesheninde jańa nysandar salatyn bolamyz», – dep atap ótti shahar basshysy.
Mádeniet salasynda ortalyqtandyrylǵan kitaphana júiesiniń 10 kitaphana- filialdary jańartylýda. «Jumyspen qamtýdyń jol kartasy-2020» aiasynda qala mýzeilerine aǵymdaǵy jóndeý jumystary júrgizildi, Almaty Creative Hub-tyń kreativti mádenietiniń strategiiasy qabyldandy.
«Osylaisha, qalanyń barlyq resýrstary jáne qolda bar múmkindikteri balalardy sportpen, shyǵarmashylyqpen, ózdiginen bilim alýǵa jáne ózdiginen damýyna keńinen tartýǵa baǵyttalǵan. Bul bizdiń ortaq maqsatymyz bolýy tiis», - dedi Saǵyntaev.
