Almatyda koronavirýs juqqan eki áiel jazylyp shyqty dep habarlady qalalyq qoǵamdyq densaýlyq saqtaý basqarmasynyń jetekshisi Tileýhan Ábildaev.
"66 naýqastyń jaǵdaiy qanaǵattanarlyq. Eki eresek adamnyń jaǵdaiy aýyr, 11 adamnyń jaǵdaiy - ortasha aýyr. Búgin infektsiialyq statsionardan eki naýqas jazylyp shyqty. Eki áieldiń biri 15 naýryzda Stambýl - Almaty, ekinshisi Egipetten 22 naýryzda ushyp kelgen" dep habarlady ol.
Qalada jalpy 13 adam jazylyp shyqqan. Ekeýi - bala.
Basqarma jetekshisiniń aitýynsha, shamamen 600 ókpeni jasandy jeldetý apparaty bar. Qazir eki adam sondai apparatpen tynys alyp jatyr.
Mamannyń sózine sensek, jasandy tynys alý apparatary qalanyń barlyq meditsinalyq uiymdarynda jetkilikti.
«Olardyń ishinde juqpaly eki aýrýhanada 17 apparat bar. Provizorlyq gospitalǵa 4 jasandy tynys alý qurylǵysy qoiyldy. Eger naýqastardyń sany kóbeietin bolsa, sol jerge jatqyzýdy josparap otyrmyz. Búgingi kúni jasandy tynys alý apparatyna eki naýqas qosyldy», - dep tolyqtyrdy T.Ábildaev.
Basqarma dereginshe, qazir provizorlyq ortalyqta 613 adam (79 bala) karantinde jatyr. Eki kúndik karantinde - 446 adam, úi karantininde 4411 adam jatyr.
Almatyda jalpy 93 adamnan koronavirýs tabylǵan.
Almaty - virýs juqtyrǵandar sany jaǵynan respýblikada Nur-Sultannan (199) keiin ekinshi tur. 19 naýryzda qalada karantin jariialanyp, qalaǵa kirip-shyǵýǵa tyiym salyndy. 28 naýryzda adamdardyń syrtqa shyǵýyna shekteý qoiyldy. Qala turǵyndary azyq-túlik, dári-dármek satyp alý siiaqty óte qajetti jaǵdaida ǵana kóshege shyǵa alady. Qalada azyq-túlik dúkenderi, dárihanalardan basqa nysandar jabyq.
