Almaty ákimi Baqytjan Saǵyntaevtyń tapsyrmasy boiynsha injenerlik jelilerdi salýdy júzege asyratyn kompaniialar jumys tehnologiiasyn buzǵany úshin jaýapqa tartylady, dep habarlaidy "Ult aqparat".
Qalalyq ákimdik taratqan málimetke sáikes, mamandandyrylǵan aýdanaralyq ákimshilik sotynyń sheshimimen «Monolit Dizain-2030» kompaniiasy litsenziiadan aiyryldy jáne 800 AEK kóleminde aiyppul tóleýge mindetteldi. Bul kompaniia «Tastybulaq» yqshamaýdanynda ortalyq kommýnikatsiialar qurylysyn júrgizgen bolatyn.
Byltyr atalǵan kompaniia jumysta jibergen kemshilikteri úshin ákimshilik sharaǵa tartyldy. Biylǵy jyldyń aqpan aiynda «Tastybulaq» yqshamaýdanynyń turǵyndary Almaty ákimine kompaniianyń jumysty aiaqtaǵan soń joldardy retke keltirýdi sapasyz júrgizgeni týraly shaǵymdanǵan edi.
Osy shaǵymnyń negizinde qaita tekserý júrgizildi, onyń qorytyndysy boiynsha birqatar kemshilikter anyqtaldy, materialdar kompaniiany litsenziiadan aiyrý úshin ákimshilik sotqa jiberildi.
Buryndary, Alataý aýdanynda injenerlik jelilerdi salýda birqatar zańbuzýshylyqtarǵa jol bergen «Sigma» kompaniiasy da sot sheshimimen litsenziiasynan aiyrylǵan edi.
Sonymen qatar, problemalyq nysandardy júrgizgen birqatar kompaniialardyń jumystary da qaita tekseriletin bolady, olardyń arasynda Tóle bi kóshesindei injenerlik jelilerdi rekonstrýktsiialaǵan «AGS-PLAST» JShS men «Suńqar» JShS bar.
Eske salsaq, jaqynda Tóle bi-Muratbaev kósheleriniń qiylysynda «AGS-PLAST» JShS-niń injenerlik jumystardy sapasyz júrgizgendigi saldarynan jol qaq airylǵan edi.
«Qazir búkil qala boiynsha qurylys jumystaryn júrgizý barysynda standarttardyń saqtalýyna baqylaý kúsheitildi. Basqarma kásibi kompaniialardy jumysty oryndaý kezinde barlyq normalar men talaptardy saqtaýǵa shaqyrady. Tekserýler qorytyndylary boiynsha barlyq tiisti sharalar qoldanylady, tipti litsenziialarynan aiyrýǵa deiin»,- delingen habarlamada.
