Almatyda BRT qurylysynyń birinshi kezeńi biyl qyrkúiekte aiaqtalady. Bul týraly onlain brifing barysynda Qalalyq mobildilik basqarmasy basshysynyń orynbasary Ernur Abjahan aitty, dep habarlaidy QazAqparat.
«Biyl qyrkúiekke deiin birinshi kezeń boiynsha jumys aiaqtalady. Bizde Jandosov kóshesinde 1 shaqyrym jol boiynda turǵan nysandardy satyp alyp jatyrmyz. Sońǵy úi tárkilenip alyndy. Qazir bul úiler kúrelip jatyr. Qyrkúiektiń sońyna deiin jol jumystary aiaqtalyp paidalanýǵa beriledi», - dedi ol.
Onyń aitýynsha, qazir BRT ekinshi kezeńine daiyndyq júrip jatyr.
«Qazir tehnikalyq sharttardy kommýnaldyq qyzmet ókilderimen kelisip jatyrmyz. Odan keiin jobaǵa memlekettik saraptama júrgiziledi», - dedi ol.
Almatyda BRT (júrdek avtobýs jelisiniń) ekinshi kezeńi qashan bastalatynyn qoǵamdyq keńes tyńdaýynda Ernur Abjahan aitqan bolatyn.
Jobanyń birinshi kezeńi - uzyndyǵy 8,7 shaqyrym bolatyn marshrýt ýchaskesi «Mustafin - Súleimenova- Jandosov – Timiriazev» kóshelerimen Jeltoqsan kóshesine deiin barady.
«BRT qurylysy qarajat bólingen jaǵdaida 2021 jyldan bastalady. Saraptama qorytyndysy shyqqan soń respýblikalyq biýdjetke saýal jiberýimiz de múmkin. Keler jyly bastasaq, qurylys jumystaryna shamamen 22 ai ketedi. Qurylys jumystary 1,5-2 jylǵa sozylady», - dedi qalalyq Mobildilik basqarmasy basshysynyń orynbasary Ernur Abjahan.
Joba quny shamamen 12 mlrd dollar dep baǵalanyp otyr. BRT jobasynyń ekinshi kezeńi, iaǵni 13 shaqyrymdyq ýchaskesi Jeltoqsan kóshesimen Tóle bi, Shyǵys ainalma joly, Halyk Arena tusyndaǵy depoǵa deiin barady.
