Almaty aýdandarynda biznesti jeńildikpen nesieleý baǵdarlamasy bastaldy, dep habarlaidy QazAqparat.
Almatynyń Naýryzbai, Alataý, Túrksib jáne Jetisý aýdandarynyń turǵyndary biznes júrgizý úshin jylyna 5% mólsherlememen nesie ala alady.
Almaty qalasynyń ákimi Baqytjan Saǵyntaevtyń tapsyrmasy boiynsha «Almaty Business» óńirlik baǵdarlamasyna tiisti túzetýler engizildi. Buǵan deiin, Almatynyń kásipkerlerine joǵaryda atalǵan baǵdarlama aiasynda jylyna 7% paiyzdyq mólsherlememen jeńildetilgen nesie berilgen.
«Almaty biznesiniń basym bóligi saýda jáne qyzmet kórsetý salasynan turady. Osyǵan bailanysty, Almaty ákimdigi men «Damý» qory saýda, sulýlyq salondary, monsha keshenderi, hostelder jáne basqa da salalarda jumys isteitin kásipkerlerdi qoldaý baǵdarlamasyna bastama jasady. Júrgizilgen taldaýǵa sáikes shaǵyn jáne orta biznes sýbektileri qala aýdandarynda birkelki shoǵyrlanbaǵan. Olardyń sany boiynsha Bostandyq, Almaly, Medeý aýdandary kósh bastap tur jáne olardyń úlesi 50%-dan asady. «Damý» qorymen kelissózder júrgizý arqyly ákimdik belsendiligi tómen aýdandardyń turǵyndary úshin paiyzdyq mólsherlemeni 7%-dan 5%-ǵa deiin tómendetti», – dep habarlady Almaty qalasy ákiminiń orynbasary Maqsat Qiqymov.
Baǵdarlamaǵa Almaty qalasynda tirkelgen jáne qyzmetin júzege asyratyn shaǵyn jáne orta kásipkerlik sýbektileri qatysa alady. Bir qaryz alýshyǵa beriletin qaryzdyń eń joǵary somasy 180 mln teńge. Syiaqynyń nominaldy mólsherlemesi – belsendiligi tómen aýdandar úshin 5%, belsendi aýdandar úshin 7%.
Óńirlik baǵdarlama aiasynda 2021 jyly tepe-teń negizde 11,2 mlrd teńge qarastyrylǵan (aýyspaly jáne revolverlik qarajat). Búgingi tańda jalpy nesie somasy 1 346,4 mln teńgeni quraityn 21 jobaǵa qoldaý kórsetildi.
