Almatyda biznes sýbektilerine kelgen zalal somasyn aiqyndaý jónindegi Óńirlik komissiianyń otyrysy ótti, dep habarlaidy QazAqparat.
Óńirlik komissiia tóraǵasy, Almaty qalasy ákiminiń orynbasary Maqsat Qiqymovtyń aitýynsha, keibir shaǵyn kásipkerler qansha jáne ne joiylǵanyn, urlanǵanyn qujattai almai otyr. Mundai jaǵdailarda, memlekettik ótemaqy alý úshin, aýdit pen baǵalaý júrgizý qajet. Biraq bul óte kúrdeli protsedýra, oǵan kóp ýaqyt ketedi.
«Biz shaǵyn kásipkerler úshin iri biznesten kómek surap, olarǵa júgindik. Viacheslav Kim men Mihail Lomtadze birden jaýap berdi. Olar 450 shaǵyn kásipkerge 3 mln teńgege deiingi shyǵyn somasymen biýrokratiialyq protsedýrasyz tez kómektesý úshin ózderiniń jeke qarajatynan 579 mln teńge bólýdi sheshti. Bul tártipsizdik kezinde zardap shekken barlyq biznes sýbektileriniń 28%-yn quraidy. Osy qoldaýdyń arqasynda, biz barlyq ótinimderdiń úshten birin jabamyz», - dedi Maqsat Qiqymov.
Aldyn ala berilgen málimetter boiynsha, Almatyda tártipsizdik pen tonaý saldarynan 1581 kásipkerlik sýbektisi zardap shekti. Shyǵyn somasy 45,6 mlrd. teńgeni qurady. Zalal somasyn aiqyndaý jónindegi Óńirlik komissiia zardap shekken obektiler boiynsha, onyń ishinde, jergilikti jerlerge shyǵa otyryp, derekterdi jinaýdy jalǵastyrýda.
