Alataý aýdanynyń Saialy shaǵynaýdanynda balalar men jastarǵa arnalǵan zamanaýi damý jáne shyǵarmashylyq ortalyǵynyń qurylysy aiaqtaldy. Jańa nysan aýdannyń áleýmettik infraqurylymynyń mańyzdy bóligine ainalyp, óskeleń urpaqtyń jan-jaqty damýyna qosymsha múmkindik beredi.
Jalpy aýmaǵy 10 myń sharshy metrden asatyn úsh qabatty ǵimarat eki aýysymda 1350 adamdy qabyldaýǵa arnalǵan. Ortalyqtyń qurylysy 2025 jyly bastalǵan. Qazirgi tańda barlyq qurylys jáne injenerlik jumystar tolyq aiaqtalyp, ainalasy kórkeitildi. Nysan paidalanýǵa berilgennen keiin 70 turaqty jumys orny ashylady.
Almatynyń Qurylys basqarmasy ókilderiniń aitýynsha, nysan bilim berý infraqurylymyna qoiylatyn zamanaýi talaptarǵa sai salynǵan.
«Bul ortalyq balalar men jastardyń damýyna qolaily ári fýnktsionaldy jaǵdai jasalǵan qalanyń zamanaýi bilim berý keńistikteriniń birine ainalady. Munda bilim berý, sport jáne shyǵarmashylyq baǵyttary qarastyrylǵan», — dedi vedomstvo ókilderi.
Birinshi qabatta 253 oryndyq kórermen zaly, júzý basseini, boks jáne jekpe-jek zaldary, sondai-aq psiholog, logoped jáne defektolog kabinetteri ornalasqan. Ekinshi qabatta horeografiia, beineleý óneri, músin jáne qysh sheberligi synyptary, mýzykalyq stýdiia jáne 3D modeldeý kabinetteri jabdyqtalǵan.
Úshinshi qabat tehnikalyq jáne ǵylymi shyǵarmashylyqqa arnalǵan. Munda robototehnika jáne elektronika zerthanalary, avia jáne keme modeldeý kabinetteri, planetarii, sondai-aq agromádenietpen ainalysýǵa arnalǵan bólmeler ornalasady.
Ortalyq biyl jazda ashylady. Jańa nysan balalar men jasóspirimderdiń qosymsha bilimge qoljetimdiligin keńeitip, olardyń shyǵarmashylyq, sporttyq jáne ǵylymi áleýetin ashýǵa múmkindik beredi. Sonymen qatar úige jaqyn jerde paidaly ári mazmundy bos ýaqyt ótkizýge jaǵdai jasaidy.
Foto: Almaty ákimdigi
Foto: Almaty ákimdigi
