Almaty qalasy áleýmettik ál-aýqat basqarma basshysynyń orynbasary Daniiar Álkebaiuly men Almaty qalasy kásipkerler palatasynyń direktory Nariman Ábilshaiyqov halyqty jumyspen qamtýdy jaqsartý barysynda atqarylyp jatqan sharalar týraly aityp berdi, dep habarlaidy QazAqparat.
«Biz biylǵy jyly barlyǵy 56 myńnan astam adamdy jumyspen qamtýdy josparlap otyrmyz. Onyń 26 myńy «Jumyspen qamtýdyń jol kartasy» memlekettik baǵdarlamasy aiasynda ornalasady», - dedi D.Álkebaiuly.
Onyń aitýynsha, bos oryndarǵa ornalasý úshin jumys izdeýshiler jumyspen qamtý ortalyǵyna barý kerek.
«Ortalyq mamandary biliktilik boiynsha qandai jumystyń qajet ekenin, qai aýdannan usynylǵanyn, jumystyń yńǵaiyn jan-jaqty qarastyryp, vakansiialardy usynady. Lokatsiialyq jaǵynan turǵylyqty mekenjaiy nazarǵa alynady. Ásirese,kópbalaly analarǵa qolaily nusqalar tańdalady», - dedi ol.
Basqarma málimetterine sáikes, aǵymdaǵy jyldyń basynan beri halyqty jumyspen qamtý ortalyǵyna 27 myńnan astam adam jumys izdep kelgen, olardyń ishinde 13,5 myńy eńbekpen qamtyldy.
«Eńbek» nátijeli jumyspen qamtýdy jáne jappai kásipkerlikti damytý baǵdarlamasynyń aiasynda kásipkerler úshin 3 yntalandyrýshy tetik qoldanylady. Bul: qoǵamdyq jumystar, áleýmettik jumys oryndary jáne jastar tájiribesi.
«Eger kásipker jumys izdeýshini qoǵamdyq jumystarǵa qabyldaityn bolsa, onda memleket árbir jumysqa turǵan adam úshin jyl sońyna deiin eki ret tómengi jalaqy tóleitin bolady. Ol áleýmettik salyqtardy ustamaǵanda 85 myń teńgeni quraidy. Qoǵamdyq jumystarǵa qamtylý uzaqtyǵy 12 aiǵa deiin», - dep túsindirdi N.Ábilshaiyqov.
