Jańa oqý jylynda 1-synypqa shamamen 30 myń oqýshy qabyldanady. Bul týraly Almaty qalalyq Bilim basqarmasynyń basshysy Lázzat Jylqybaeva brifing barysynda aitty, dep habarlaidy "Ult aqparat".
«1 maýsymnan 30 tamyzǵa deiin 1 synypqa baratyn balalardyń zańdy ókilderinen bilimalmaty.kz portaly arqyly ótinishter qabyldanady.
Atalǵan protsedýra boiynsha qazir ata-analar arasynda qajetti túsindirý jumystary júrgizilýde.Jalpy boljamdy málimetterge sáikes, 1synyptarǵa 30 myńnan astam bala qabyldanady», – deidi Lázzat Jylqybaeva.
Onyń aitýynsha, qazir qaladaǵy mektepterde oqýshylar ornynyń jetispeýshiligi ózekti bolyp otyr. Qala boiynsha shamamen 30 myńdai oryn tapshy bolyp tur. Jyl saiyn ósip otyrǵan kontingentti eskeretin bolsaq, kelesi jyly oqýshy orny budan ári ósýi múmkin.
«Búgingi kúni memlekettik mektepterdiń 40paiyzyna kóp salmaq túsip otyr. Osyǵan bailanysty Almaty ákimdigi tarapynan bilim berý uiymdaryn qarqyndy salý baǵdarlamasy ázirlengen. Bul baǵdarlama qalanyń shetki aýdandarynda mektepterdi salý arqyly iske asyrylady», – deidi ol.
Máselen, osy jyly Alataý, Naýryzbai, Túrkisib aýdandarynda 9 mektep jáne 13 mektepke qosymsha ǵimarat salý josparlanǵan. Nátijesinde 2020-2021 jyldary 20 myńǵa jýyq oqýshy orny iske qosylmaq.
«Sonymen qatar, respýblikalyq jáne jergilikti biýdjettiń qarjysymen 2 mekteptiń qurylys jumysy aiaqtalýda jáne qosymsha 8 mektepke ǵimarat salynyp jatyr. Olar aiaqtalsa, 5 myńnan astam oqýshy orny iske qosylady. Memlekettik jekemenshik áriptestik jáne áleýmettik jaýapkershilik aiasynda osy jyly 5 mekteptiń qurylysy jáne qosymsha 2 ǵimarat salý bastalady. Bul 6 myńǵa jýyq oqýshyny qamtidy. Sondai-aq, 4 jekemenshik mekteptiń qurylysy júrip jatyr, - deidi Lázzat Jylqybaeva.
Onyń aitýynsha, 2020-2021 jyldary bilim berý uiymdaryn qarqyndy salýdyń arqasynda 47 463 qosymsha oqýshy oryny iske qosylady. Bul mektepterdegi oryn jetispeýshiligin 80 paiyzǵa azaitady.
Sonymen birge, 2020 jyldyń jaz maýsymynda josparly túrde alty mektepte kúrdeli jóndeý jumystary bastalady.
