Almatdaǵy QR Qorǵanys ministrliginiń bitimgerler daiyndaityn ortalyǵynda Qazaqstan-Úndistan synyby ashyldy. Bul shara Qazaqstan men Úndistan arasyndaǵy qorǵanys jáne bitimgershilik salasyndaǵy ekijaqty yntymaqtastyqty odan ári damytý sheńberinde uiymdastyrylǵan, dep habarlaidy "Ult aqparat".
Sharaǵa QR Qorǵanys ministriniń orynbasary, general-maior Muhamedjan Talasov, Úndistannyń Qazaqstandaǵy Tótenshe jáne Ókiletti Elshisi Prabhat Kýmar myrza, sondai–aq, áskeri diplomatiialyq korpýstyń ókilderi qatysty.
Búgingi kúni ortalyqta Qazaqstan Qarýly Kúshteriniń bitimgershilik kúshteri oqýdan ótip jatyr. Tájirbieli nusqaýshylar jaýyngerlik daiyndyq baǵdarlamasy boiynsha psihologiialyq jáne aǵylshyn tili testinen, teoriia men praktikadan ótetin áskeri qyzmetkerlermen jan-jaqty jumys istep jatyr. Barlyq daiyndyq halyqaralyq standarttarǵa sáikes júzege asyrylady. Ár túrli bitimgershilik missiialarda bolǵan áskeri qyzmetshiler de óz tájiribelerin bolashaq bitimgershilik kúshterge úiretýde.
Sonymen qatar, ekijaqty kezdesý barysynda general-maior Muhamedjan Talasov pen Prabhat Kýmar myrza úndi kontingenti quramyndaǵy qazaqstandyq bitimgershilik kompaniianyń BUU missiiasyna qatysýyn, sondai-aq qorǵanys salasyndaǵy ekijaqty yntymaqtastyqty odan ári damytý máselelerin talqylady.
«Biz úndi tarapynan qazaqstandyq áskeri qyzmetshilerdiń BUU bitimgershilik missiialaryna praktikalyq qatysý josparlaryn joǵary baǵalaimyz. Osy turǵyda alǵashqy birlesken qazaqstan-úndi bitimgershilik aýditoriiasynyń ashylýy Qazaqstannyń bitimgershilik áleýetin nyǵaitý tarihynyń shejiresinde jazylatyn bolady. Bul qadam Qazaqstan men Úndistannyń qorǵanys vedomstvolarynyń beibitshilik pen qaýipsizdikti nyǵaitý maqsatynda qarym-qatynasty odan ári damytýǵa degen qyzyǵýshylyǵyn rastaidy», - dedi Qorǵanys ministriniń orynbasary.
Óz kezeginde, Prabhat Kýmar Qazaqstan Úndistannyń qorǵanys salasyndaǵy negizgi seriktesi ekenin atap ótti jáne kásibi sheberlik pen jaýyngerlik daiarlyqty joǵary baǵalady.
