Almatyda onlain nesieden aldanǵandardyń qatary kóbeidi. Bul týraly qalalyq politsiia departamenti bastyǵynyń orynbasary Rústem Ábdirahmanov málim etti, dep habarlaidy "Ult aqparat".
Almaty qalalyq politsiia departamenti shaǵyn nesie uiymdary men kollektorlyq kompaniialardyń basshylarymen jinalys ótkizdi.
Jiyn barysynda shaǵyn qarjy uiymdarynyń qaýipsizdik júiesin nyǵaitý máseleleri talqylandy.
«Dóńgelek ústelde talqylanǵan negizgi taqyryptyń biri - birneshe jyl boiyna ózektiligin joǵaltpaǵan, kerisinshe, internette belgili bir basymdyqqa ie bolyp otyrǵan onlain nesiege bailanysty jaǵdai. Búginde bizdiń elde azamattarǵa onlain aqshalai nesie beretin 20-ǵa jýyq kompaniia jumys isteidi. Bul óte yńǵaily, biraq ekinshi jaǵynan, tájiribe kórsetkendei óte qaýipti. Ókinishke qarai, alaiaqtar qashyqtan qoljetimdi shaǵyn qarjy uiymdary arqyly basqa adamdardyń jeke derekterin paidalanyp, aqshalai nesie alady. Onlain nesieden aldanǵandardyń qatary kóbeidi», - dedi Almaty qalalyq politsiia departamenti bastyǵynyń orynbasary Rústem Ábdrahmanov.
Onyń aitýynsha, bul faktiler onlain nesieleýdegi álsiz aqparattyq qaýipsizdikti kórsetedi.
«Jiyn barysynda biz, aldanǵan ondaǵan azamat kómekke júginetin tergeý organy retinde, osy ShQU-nyń qaýipsizdik júiesine túzetýler engizýdi usyndyq, sonyń arqasynda osy qylmystardyń jasalýyn barynsha azaitýǵa jáne halyqty qorǵaýǵa bolady»,-deidi ol.
Birinshiden, onlain nesie alýǵa suranys túsetin uialy telefon nómiriniń tirkelýin ony rásimdegen adamnyń jeke derekterimen birge mindetti túrde tekserý kerek.
Ekinshiden, nesie rásimdelip jatqan azamattyń bank kartasyna aýdarylǵan qarajattyń maqsaty týraly mindetti sms-habarlama jiberilýi tiis.
Úshinshiden, adamdy jeke biometriialyq parametrleri boiynsha taný qajet.
