«Rýhani jańǵyrý» qazaqstandyq qoǵamdyq damý institýty jastardy otbasylyq ómirge daiyndaý boiynsha ádistemelik usynystar daiyndady. Ádistemelik qural muǵalimderge, joǵary synyp oqýshylaryna, 1-2 kýrs stýdentterine sabaq beretin mamandarǵa arnalǵan, dep habarlaidy "Ult aqparat".
«Neke jasyna jetken búgingi jastar kóp jaǵdaida otbasyn qurýǵa umtylmaidy. Jastardyń kóbi otbasylyq, erli-zaiyptylyq qarym-qatynastar týraly túsinikteri túbegeili ózgerip, jeńil qaraýǵa kóshken. Nátijesinde erkin qarym-qatynastar artýy saldarynan tolyq emes otbasylar sanynyń ósýi baiqalady. Sondai-aq, neke seriktesine qoiylatyn talaptar artqan. Osylaisha búginde otbasy institýty daǵdarysty bastan keshirip jatyr, ajyrasýlar sany ósip, tirkelgen nekeler azaiyp jatyr», – deidi ádistemelik nusqaýlyqty qurastyrýshylar.
Usynymdar psihoseksýaldyq damý jáne reprodýktivti densaýlyq týraly bilimdi qalyptastyrý, otbasyndaǵy rólderdi bólý týraly ideialar, otbasylyq qatynastar salasyndaǵy memlekettik saiasatty zertteý, Neke jáne otbasy týraly zańnamanyń negizderimen tanysý, adamgershilik qasietterdi tárbieleý, tulǵaaralyq qarym-qatynas erekshelikterin zertteý siiaqty aspektilerdi qamtidy.
Oqý quralynda pikirtalastar, mamandardyń dáris-keńesteri, ózin-ózi diagnostikalaý sabaqtary, video prezentatsiialar, tanymdyq oiyndar jáne taǵy basqa ádistemeler arqyly jastardyń bilimderin arttyrýǵa bolatyndyǵy aitylǵan.
Mysaly, ádistemelik quradal «Mahabbat pen dostyq týraly ne bilemiz», «10 Men», «Dos izdeimin» jattyǵýlaryn, «Kompliment» oiynyn, «naǵyz» erkek pen áielge tán qasietterdi qurastyrýǵa arnalǵan praktikalyq tapsyrmalardy, «idealdy» juptyń portretin jáne jubaiyna qajet qasietterdi egjei-tegjeili sipattaidy. Sondai-aq jattyǵýlar qatarynda I. Iýndanyń adamnyń otbasylyq ómirge daiyndyǵyn baǵalaý saýalnamasy, «Aisberg – qaqtyǵysta ózimdi qalai ustaimyn» jattyǵýlary bar.
Sonymen birge, barlyq óńirdegi otbasyn qoldaý qyzmetteriniń bailanys derekteri, otbasy-neke qatynastary salasyndaǵy normativtik-quqyqtyq qujattar, sondai-aq jas otbasylarǵa arnalǵan turǵyn úi qatynastary salasyndaǵy baǵdarlamalar, jeńildikter tizbegi usynylǵan.
Qazirgi qoǵamnyń mańyzdy máseleleriniń biri – otbasy institýtynyń mańyzdylyǵyn túsiný. Sondyqtan qazirgi jaǵdaida otbasylyq áleýmettaný jáne jeke tulǵany tárbieleý qajettiligi týyndady. Óskeleń urpaqtyń áleýmettenýi, bolashaq otbasylardyń ál-aýqaty kóbinese osy aspektini iske asyrý sapasyna bailanysty, – delingen ádistemelik nusqaýlyqta.
