Almatylyq kelinshek balasynyń oń kózine jasalýy tiis operatsiiany onyń sol kózine jasady dep dárigerlerdiń ústinen shaǵym túsirdi. Osyǵan orai qalalyq politsiia tekserýdi bastady, dep habarlaidy QazAqparat.
Almaty qalalyq politsiia departamenti atalǵan fakti Bostandyq aýdandyq politsiia basqarmasynda tirkelgenin málim etti.
«Óndiristik materialdar tekserý úshin Almaty qalasy boiynsha taýarlar men qyzmetterdiń sapasy men qaýipsizdigin baqylaý departamentine jiberildi. Is boiynsha sot-meditsinalyq saraptama taǵaiyndalatyn bolady», - dep habarlady politsiiadan.
Aita keteiik, bul týraly qazaqstandyq bloger Aidyn Toqsanbaeva áleýmettik jelidegi paraqshasynda aitty.
«Balammen birge Manas, 40 mekenjaiynda ornalasqan «Balalar shuǵyl meditsinalyq ortalyǵyna» kvota arqyly kózine operatsiia jasatý úshin jattym. Onyń oń kózinde kista bolǵan. Ol keiin túsip qaldy. Dárigerler túbinde tamyry qalyp ketti, sony alý kerek dedi. Kvotamen kelip otyrmyz. Keshe túnnen bastap eshteńe jegizbei, ishkizbei, tańerteń balany alyp ketti. Endi oń kózine jasalýy kerek bolǵany otany sol kózine jasap ákelip tur», – deidi Aidyn Toqsanbaeva.
