Almaty qalasynyń bas sanitarlyq dárigeri Jandarbek Bekshin onlain brifing barysynda QR Memleket basshysynyń málimdemesinen keiin balalardy aýlada oinatý tártibiniń jańa erejesin túsindirdi, dep habarlaidy QazAqparat.
«Balalar alańyn paidalaný boiynsha Prezidenttiń málimdemesinde aitylǵan tapsyrmany oryndaý maqsatynda jan-jaqty talqylap arnaiy qaýly shyǵardyq. Qazir Almaty qalasynyń turǵyndaryna tańǵy 6:00-den keshki 21:00-ge deiin balalar jáne demalys alańdaryna shyǵýǵa ruqsat berildi. Biraq arnaiy talaptarymyz bar. 14 jasqa deiingi balalardyń ata-anasy mindetti túrde qasynda bolýy kerek. Mindetti túrde betperde kiiý kerek. Úi aýlasynan syrtqa shyqpaýy kerek. Dalaǵa shyqqan kezde úsh adamnan artyq jinalýǵa bolmaidy. Adamdar aralyǵynda qashyqtyq 2 metr bolýy tiis», - dedi Jandarbek Bekshin.
Sonymen qatar almatylyqtarǵa aýlada sportpen ainalysýǵa tyiym salyndy.
«Sanitarlyq ereje eń aldymen koronavirýs qaýpiniń aldyn alýǵa arnalǵan. Osy oraida mynandai usynys berip jatyrmyz. Balalar shoǵyrlanbaýy úshin fýtbol, basketbol siiaqty oiyn oinaýǵa tyiym salynady», - dedi Jandarbek Bekshin.
Qala ákiminiń birinshi orynbasary Erlan Qojaǵapanovtyń aitýynsha, karantinge jabylǵan virýs oshaqtary sanalatyn úilerdiń turǵyndaryna aýlaǵa shyǵýǵa qatań tyiym salynady.
