Almatyda jasóspirimderdiń qolynan uialy telefondy tartyp alyp ketken jigit ustaldy, dep habarlaidy "Ult aqparat".
Almaty qalalyq Politsiia departamentiniń málimetinshe, 22 jastaǵy N. esimdi er adam 12-15 jas aralyǵyndaǵy balalardyń telefonyn tartyp alǵan. Ol kámeletke tolmaǵandardyń qasyna kelip, bir ret qońyraý shalý úshin telefondy surap, sodan keiin qashyp ketken.
«Buryn sottalmaǵan jas jigit óziniń áreketin aqshanyń jetispeýshiligimen túsindirdi. Qazir ol Politsiia departamentiniń ýaqytsha ustaý izoliatorynda qamaýda otyr», – dedi Naýryzbai aýdandyq Politsiia basqarmasynyń bastyǵy Didar Ahanov.
Kúdiktige QR QK-niń 191-baby (Tonaý) boiynsha sotqa deiingi tergeý amaldary júrgizilýde.
