Almaty ákimi Baqytjan Saǵyntaev mektepke deiingi bilim berýdiń ózekti máseleleri boiynsha keńes ótkizdi, dep habarlaidy "Ult aqparat".
Memlekettik mektepke deiingi mekeme basshylarynyń qatysýymen ótken keńeste balabaqshalardaǵy oryn tapshylyǵyn azaitý, balalardy tamaqtandyrýdyń jáne densaýlyq jaǵdailaryn meditsinalyq baqylaýdyń sapasyn arttyrý, mektepke deiingi bilim berý ári tárbieleý úrdisterin, ákimshilik tarapynan menedjementti jaqsartý, sybailastyq táýekelderine qarsy is-qimyl júrgizý máseleleri qaraldy.
Búgingi kúni Almatyda 824 mektepke deiingi uiym bar, onyń 189-y memlekettik, oǵan 65 myńnan asa bala barady. 3 jastan 6 jasqa deiingi balalardy qamtý shamamen 90%-dy quraidy.
Balabaqshalarda oryn tapshylyǵyn azaitý maqsatynda 640 oryndy tórt memlekettik balabaqshanyń qurylysy júrýde. Sonymen birge, jergilikti biýdjettiń qarjysy esebinen jeke balabaqshalardaǵy ata-analardyń tólemderin ishinara óteý tetikteri pysyqtalýda. Bul qosymsha 5 myń oryn qurýǵa múmkindik beredi. Taǵy 2,2 myń oryndy qoldanystaǵy nysandardy qaitarý nemese jańartý arqyly ashý josparlanyp otyr.
Keńeste balabaqshalar basshylarynyń jaýapkershiligin kúsheitýge erekshe nazar aýdarý kerektigi sóz boldy. Ásirese, qarjy tártibin saqtaý óte mańyzdy, óitkeni mektepke deiingi bilim berý salasyna bólinetin qarjy kólemi ósti. Sonymen birge, balabaqsha meńgerýshileri bilim berý protsesiniń joǵary mazmundyq sapasyn qamtamasyz etip, qosymsha sabaqtar ótkizýdi engizýleri tiis.
Kún tártibindegi ózekti máseleniń biri – balalar taǵamynyń sapasyn arttyrý jáne qaýipsizdik sharalaryn kúsheitý. Baqylaýdy kúsheitý úshin beinebaqylaý júiesi keńinen engizilip, «soqyr aimaqtar» jabylýda.
Koronavirýstyq pandemiia jaǵdaiynda sanitarlyq-epidemiologiialyq qaýipsizdik normalaryn saqtaýǵa erekshe nazar aýdarylady. Sanitarlyq dárigerler sanitarlyq qaýipsizdik erejeleriniń belgilengen tártibiniń saqtalýyn anyqtaý úshin turaqty monitoring júrgizedi.
Almaty ákimi Baqytjan Saǵyntaev qarjylyq tártipke baqylaýdy kúsheitýdi jáne menedjmentti kúsheitý boiynsha sharalar qabyldaýdy tapsyrdy. Budan bylai balabaqsha meńgerýshileriniń jumysy iske asyrylǵan KPI arqyly baǵalanatyn bolady. Budan ózge, qamqorshylyq keńesteriniń quramy qaita qaralady, olardyń quramynda belsendi ómirlik ustanymdary bar ata-analar bolýlary tiis.
