Almatyda azyq-túlik baǵasy qymbattaýy múmkin be? Qalalyq Kásipkerlik jáne investitsiialar basqarmasy basshysynyń orynbasary Damir Tazabek brifing barysynda osy saýalǵa jaýap berdi, dep habarlaidy QazAqparat.
«Biz qaladaǵy baǵany tejeý úshin barlyq sharany qoldanamyz. Bizde eki mehanizm bar - yntalandyrý, iaǵni kásipkerlik sýbektilerine baǵany ustap turý boiynsha mindettemeler men ákimshilik resýrstardy alý úshin qaryz berý, iaǵni shekti baǵalardy baqylaý», - dedi ol.
«2021 jyldyń basynan beri qalada áleýmettik mańyzy bar azyq-túlik taýarlaryna baǵa indeksi 109,6 paiyz boldy. Bul kórsetkish ortasha respýblikalyq kórsetkishten 0,1 paiyzǵa tómen bolyp, qala 19 óńir arasynda 15-shi orynda tur. Áleýmettik mańyzy bar azyq-túlik baǵasy 9,6 paiyzǵa ósti. Bul - makroekonomikalyq kórsetkish, biraq biz qaladaǵy baǵany ustap turý úshin barlyq sharany qoldanamyz», - dedi spiker.
Aita keteiik, áleýmettik mańyzy bar taýarlar tizimine birinshi surypty un, nan, qaraqumyq, kúrish, kartop, sábiz, piiaz, qyryqqabat, kúnbaǵys maiy, siyr eti (súiekteri bar jaýyryn-keýde bóligi), taýyq eti, sút 2,5 paiyz, airan, sary mai, jumyrtqa, tuz jáne súzbe kiredi.
Ákimdik málimetinshe, jergilikti biýdjetten 10 milliard teńge bólingen, olar qalanyń saýda jelileriniń sórelerindegi baǵalardy tirkeýge, sondai-aq óndirýshilerdiń satý baǵalaryn tirkeýge baǵyttalǵan.
