Foto: QR MAM
Almaty qalasynyń Ortalyq memlekettik arhivinde «Joshy ulysynyń tarihi murasy: Áz Jánibek hanǵa arnalǵan qoljazbalardyń faksimildi basylymdarynyń prezentatsiiasy» atty ǵylymi is-shara ótti, dep habarlaidy Ult.kz.
Is-shara aiasynda Joshy ulysynyń dańqty bileýshisi Áz Jánibek hanǵa arnalǵan eki biregei qoljazba faksimildi túrde usynyldy. Atap aitsaq, «Turar ál-mýlahhas fil-háiá» («Astronomiiaǵa qysqasha sholýdyń negizgi túiinderi») jáne «Týhfátý ál-Haqan fi sharh ál-arba’in hadisán» («Qaǵanǵa tartý: qyryq hadistiń túsindirmesi») basylymdary.
Qoljazbalar «Arhiv - 2025» keshendi jospary aiasynda uiymdastyrylǵan arheografiialyq ǵylymi ekspeditsiia barysynda Túrkiia arhivterinen qoljazbatanýshy Ómirbek Qanai anyqtaǵan.
1335 jyly jazylǵan Iýsýf bin Múbárák ál-Alanidyń «Turar ál-mýlahhas fil-háiá» eńbegi – ortaǵasyrlyq ataqty astronom jáne matematik Mahmud ibn Muhammed ibn Omar ál-Shaǵminidiń «ál-Mýlahhas fil-háiá ál-basita» atty eńbegine jasalǵan ǵylymi túsindirmesi.
1350–1351 jyldary jazylǵan «Týhfátý ál-Haqan fi sharh ál-arba’in hadisán» eńbeginde Áz Jánibek hannyń qasietterin sipattaityn madaqtaýlar men bileýshilerge arnalǵan hadister jinaǵy usynylǵan. Eńbektiń kirispesinde hannyń ǵylym-bilimdi damytýǵa, meshit-medreseler, hanaka, shipahana jáne kitaphanalar saldyrýǵa erekshe mán bergeni atap kórsetilgen.
Ǵylymi is-sharaǵa jetekshi ǵylymi uiymdardyń ókilderi, ýniversitet oqytýshylary, tarihshylar, ǵalymdar, arhivister, doktoranttar men magistranttar qatysty.
