Almaty politseileri áielge qaraqshylyq shabýyl jasaǵan er adamdy ustady, dep habarlaidy "Ult aqparat".
Almaty qalalyq Politsiia departamenti taratqan málimetke sáikes, Bostandyq aýdany Radostovets kóshesindegi úilerdiń birinen «102» pýltine saǵat 00:50-de qońyraý kelip túsken. Onda kórshi páterden kómek surap aiqailaǵan daýysty estigeni aitylǵan.
«Biz sol mekenjaiǵa dereý jettik. Úidegi adam esikti ashpai, eshqandai kómek kerek emes ekenin aitty. Biraq, áieldiń daýysy úreili bolyp kórindi. Sondyqtan máseleniń anyq-qanyǵyna kóz jetkizbei, oqiǵa ornynan ketpedik. Al esikti ashýdy suraǵanda, eshkim jaýap qatpady. Áriptesim kilt sańylaýynan qaraǵanda betperde kigen er adamnyń áieldiń tamaǵyna pyshaqty taqap turǵanyn baiqady» - dedi Almaty qalalyq PD Jol-patrýldik politsiia polkiniń inspektory Nurdos Turlybek. Osydan soń politsiia úige kirip, kúdiktini ustaǵan.
Tekserý barysynda kúdiktiniń buryn tórt ret sottalǵany anyqtaldy.
Qalalyq kriminaldyq politsiianyń málimetinshe, kúdikti kóshede qyzdyń sońynan túsip, onyń páterine basa-kóktep kirgen. Úide eshkim bolmaǵan.
«Ol pyshaqpen qorqytyp, jábirlenýshiden qundy zattary men aqsha berýdi talap etken. Alaida kórshiniń der kezinde habar berýi arqasynda qaskóidiń qylmysy iske aspady. Ol qamaýǵa alyndy. Qylmystyq is Bostandyq aýdandyq politsiia basqarmasynda tergelýde. Oqiǵa ornynan zattai aiǵaqtar alynyp, is materialdaryna tirkeldi», – dedi Almaty qalalyq PD kriminaldyq politsiia basqarmasynyń bastyǵy Erkin Ińkárov.
