Qala ákimi Baqytjan Saǵyntaev Túrksib aýdany ákiminiń turǵyndar aldyndaǵy esep berý kezdesýine qatysty, dep habarlaidy QazAqparat.
Aýdan ákimi Baqytjan Aqjarov buǵan deiingi kezdesýlerde aitylǵan jáne áleýmettik jelilerde jariialanǵan máseleler men ótinishterdiń qalai júzege asyrylyp jatqanyn baiandady.
Aýdandaǵy eń ózekti máselelerdiń biri – kommýnaldyq infraqurylym. Mysaly, 25 myń jeke úidiń 24 myńǵa jýyǵy gazben qamtamasyz etildi. Qalǵan 929 úige magistraldy jeli tartyldy. Búginde 625 úige ishki júielerdi qosý jáne montajdaý jumystary júrgizilip jatyr.
Ortalyq sýmen jabdyqtaý jáne káriz júiesine qosylý máselesi de ózektiligin joimai tur. 20 myńǵa jýyq úidiń sý burý júiesi bolmasa, 3 myńnan astam úi sý júiesine qosylmaǵan. Osy máseleni sheshý baǵytyndaǵy «Qairat» pen «Álmerek» yqshamaýdandarynda júrip jatqan injenerlik jelilerdiń qurylysy aiaqtalýǵa jaqyn, al «Nurshashqan» aýdanynda jalǵasýda. Bul jumystar aýdannyń 10 myńǵa jýyq turǵynyn qamtyǵan 2400 úidi ortalyq kommýnikatsiiamen qamtamasyz etýge múmkindik beredi. Qalǵan úiler boiynsha qujattar daiyndalyp jatyr.
Jiynda sóz alǵan «Álmerek», «Qairat», «Nurshashqan» yqshamaýdandary men «Aviator» baý-baqsha qoǵamynyń turǵyndary jaryqtyń tarifi qymbattaǵanyn aityp, onyń jii óshetinine shaǵymdandy. Qala ákiminiń tapsyrmasy boiynsha iesiz jatqan jelilerdi «AJK» AQ-nyń balansyna berý jumystary júrgizilýde. Jumystar 2020 jyldyń shilde aiynda aiaqtalady. Sonymen qatar, jyl sońyna deiin uzyndyǵy 134 shaqyrym bolatyn 254 kósheniń syrtqy jaryqtandyrý jelileri júrgiziledi.
Budan ózge Mailin, B. Hmelnitskii kóshesi, Súiinbai men Rysqulov, Seifýllin dańǵyldarynyń boiynda jańǵyrtý jumystary júrgizilip, 2 myńnan astam únemdi jańa jaryq núkteleri ornatyldy. Biyl Qapshaǵai kópiri men Jansúgirov kóshesindegi shamdardy jańǵyrtý josparlanǵan. Aýdan aýmaǵynda 569 aýla bar, onyń 400 aýlasy jańǵyrtyldy. 2020 jyly taǵy 103 aýlany abattandyrý josparlanýda. Qalǵan 66 aýla jóndeýge jaramsyz. Sebebi 26-sy jańa yqshamaýdandar bolsa, 40-y «eski turǵyn úi» sanatyna jatqyzylǵan. Aýdan ákimi Baqytjan Aqjarovtyń málimetinshe, biyl 36 kóshede (27 km astam) joldardy ortasha jóndeý jáne 17 kóshede (12 km) trotýarlar salý josparlanǵan. Buǵan deiin uzyndyǵy 5,5 shaqyrymnan astam 15 kóshege ortasha jóndeý jumystary júrgizildi.
Kezdesýde Shahar basshysy Baqytjan Saǵyntaev mektepter, úiler jáne áleýmettik nysandardyń janynda jaiaý júrginshiler jolynyń bolmaýyna shaǵymdanǵan turǵyndardyń barlyq usynystaryn jinaqtaýdy tapsyrdy.
«Aýdandarda baǵdarshamdardy ornatý, jaiaý júrginshiler ótkelderin retke keltirý, sport alańdary men trotýarlar salý boiynsha júrgizilip jatqan barlyq jumystardy turǵyndardyń tilekterin eskere otyryp túzetý qajet. Turǵyndar neniń jaqsy jáne neniń qajet ekenin jaqsy biledi», – dedi Baqytjan Saǵyntaev.
