"Almatydaǵy «Alǵabas-6» yqshamaýdanynda taǵy bir úidiń qabyrǵasy qisaidy. Toǵyz qabatty nysannyń bir jaǵyna qarai jantaiǵanyn jergilikti turǵyndar baiqaǵan eken", - dep habarlaidy KTK arnasy.
Sondyqtan olar qaýipti úidi dereý tekserý kerek dep dabyl qaǵýda. Alaida halyqtyń janaiqaiyna qulaq asar jan bolmai otyr. Aita keteiik, bul – atalǵan yqshamaýdanda jurttyń záresin ushyrǵan úshinshi nysan.
Mundaǵy jurt 156 jáne 158-shi úilerdiń de qabyrǵasy qisaidy dep dabyl qaǵýda. Iaǵni bir-birine japsarlas salynǵan toǵyz qabatty qos úidiń ústińgi qabattary aýytqi bastapty. Memlekettik baǵdarlamamen salynǵan baspanalardyń bir jaǵyna qarai jantaiyp turǵanyn turǵyndar bir apta buryn baiqaǵan eken.
"15-16 jyl kezekte turyp bir kúni astyna túsip ketemiz be, álde qulap qala ma, bala-shaǵa aram óle me dep qorqamyz. Kúnimen-túnimen qorqamyz", - deidi Almaty qalasynyń turǵyny Kúlshariia Elamanova.
Boiyn qorqynysh bilegen jurt úileriniń apatty jaǵdaida turǵanyn aityp atqaminerlerge shaǵymdanǵan. Alaida oǵan eshkim qulaq aspady deidi ashynǵandar. Tipti tótenshe jaǵdai qyzmetkerleri de «qoryqqanǵa qos kórinedi» dep telefon tutqasyn tastai salatyn kórinedi. Sondyqtan jinalǵandar jaýapty mamandardan úidiń qanshalyqty qaýipti-qaýipsiz ekenin tekserip, naqty qorytyndy shyǵaryp berýlerin talap etip otyr.
"Eki kún buryn artqy jaqta komissiia júr degesin bardyq. Ákimdikten bir kisi bolǵan soǵan jolyǵyp jaǵdaidy aittyq. Janymyzdaǵy úidiń qisaiǵanyn aittyq, nómirin kórsettik. Ol kisi aitty qazir jarty saǵatta kelemiz, kóremiz, ózim qarap, erteń maman jiberemin degen. Odan beri úsh kún ótti", - deidi Almaty qalasynyń turǵyny Aqmaral Ámirova.
Osylaisha halyqty aldaǵan sheneýnikter eshkimge ustatar emes. Tipti tilshilerge de tushymdy jaýap berýden jaltarýda. Al Alǵabastaǵy apatty úilerge qatysty ótkizgen jiyndary jabyq esik jaǵdaiynda ótedi eken.
Atqaminerlerdiń halyqtan qashatyndai da jóni bar. Sebebi, Alǵabastaǵy apatty úilerdiń sany kún sanap kóbeiip keledi. Iaǵni senimdi aqparat kózderiniń aitýynsha qazir bul keshendegi toǵyz qabatty 11 úidiń qabyrǵasy qisaiǵan kórinedi. Sondyqtan eń qaýipti degen úsh nysannyń ainalasy qorshalyp, qazir irgetasy nyǵaitylýda.
