Almatyda er adam óz nemeresin aiaýsyz soqqyǵa jyqqan video áleýmettik jelide tarap ketti, dep habarlaidy "Ult aqparat".
Beinekadrda tósekte jatqan balany aiaýsyz soqqylaǵan er adamdy kórýge bolady. Bala janushyra kómekke shaqyrady.
Almaty Politsiia departamenti baspasóz qyzmetiniń málimetinshe, oqiǵa 15 aqpanda bolǵan. Alaida, balanyń anasynan shaǵym Túrksib aýdandyq politsiia basqarmasyna 6 naýryzda túsken. Áieldiń aitýynsha, ákesi 10 jastaǵy nemeresin soqqyǵa jyqqan.
«Oqiǵa bolǵan mekenjaiǵa aýdandyq ýchaske inspektory jáne iývenaldy politsiia basqarmasynyń otbasylyq qorlyq-zombylyqtan áiel quqyǵyn qorǵaý bólimshesinen qurylǵan tergeý-jedel toby bardy. Balaǵa qol kótergen er adam qalalyq narkologiialyq dispanserde yrqynan tys em alyp júrgen», - dedi Almaty PD resmi ókili Saltanat Ázirbek.
Atalǵan derek boiynsha er adamǵa qatysty Ákimshilik quqyq buzýshylyqtar Kodeksiniń 73 babynyń 1 bólimi boiynsha (soǵý nemese ózge de kúsh kórsetý áreketteri, dene jaraqatyn salý, densaýlyǵyna qater tóndirmegen) sotqa deiingi tergeý isi tirkeldi.
Balanyń dene jaraqaty deńgeiin anyqtaý úshin sot meditsinalyq saraptama taǵaiyndaldy.
«Saraptama nátijesi boiynsha bala jeńil jaraqat alǵan. Qazirgi ýaqytta barlyq material Almaty aýdanaralyq ákimshilik sotynyń qaraýynda», - dedi Saltanat Ázirbek.
Sondai-aq, nekeden ajyrasqan áiel kámeletke tolmaǵan úsh balasymen birge áke-sheshesiniń úiinde turatyny belgili boldy. Ata-anasymen otbasynda kikiljiń paida bolǵan. Qazirgi tańda áiel balalarymen Almaty oblysyndaǵy týystaryna ketken.
