Búginge deiin apatty dep tanylǵan baspanadan 140 almatylyq otbasy jańa páterge kóshti, dep habarlaidy QazAqparat.
Almaty «Áleýmettik-kásipkerlik korporatsiiasy» AQ málimetinshe, 2019 jyldyń basynan beri turǵyn úi qoryn qaita jańartý baǵdarlamasy aiasynda 140 otbasy jańa baspanaǵa ie boldy.
«140 otbasy jańa páterge ie boldy, onyń 30-y tozyǵy jetken úileriniń ornyna jańa turǵyn úi keshenderiniń qurylysy aiaqtalǵansha ýaqytsha baspanany tańdady», - dep túsindirdi vedomstvodan.
Búgingi tańda Almaty qalasynda 1930-1975 jyldar aralyǵynda salynǵan eki qabatty 1427 eski úi bar. Olardyń kópshiligi Túrksib aýdanynda (607 úi) ornalasqan. Eski úilerdiń negizgi mańyzdy problemalary: seismikalyq jáne órt qaýiptiligi, sondai-aq injenerlik kommýnikatsiialardyń bolmaýy.
