QR Memlekettik keńesshisi Erlan Qarinniń tóraǵalyǵymen qazaq aǵartýshysy, ǵalym, aqyn, qoǵam qairatkeri Ahmet Baitursynulynyń 150 jyldyq mereitoiyn daiyndaý jáne ótkizý jónindegi memlekettik komissiianyń otyrysy ótti, dep habarlaidy "Ult aqparat" Aqordanyń resmi saityna silteme jasap.
Jiynda jyl basynan beri mereitoidy ótkizý aiasynda birqatar mańyzdy ǵylymi-zertteý, aǵartýshylyq, mádeni-buqaralyq is-sharalar ótkizilgeni atap ótildi.
Erlan Qarin Ahmet Baitursynulynyń murasyn nasihattaýǵa baǵyttalǵan halyqaralyq, respýblikalyq, óńirlik is-sharalardy jyl sońyna deiin joǵary deńgeide ótkizý qajettigin atap ótti. Almatyda ǵalymǵa eskertkish ornatý josparlanǵan. Onyń 12 tomdyq tolyq shyǵarmalar jinaǵy basylymǵa daiyndalyp jatyr. IýNESKO-nyń shtab-páterinde jáne TÚRKSOI aiasynda is-sharalar ótkizý kózdelgen. TÚRKSOI uiymy jyl saiyn kórnekti túrkitanýshy ǵalymdarǵa beriletin Ahmet Baitursynuly atyndaǵy tósbelgi taǵaiyndaý týraly sheshim qabyldady.
Otyrysta Ǵylym jáne joǵary bilim ministri Saiasat Nurbek, Mádeniet jáne sport ministri Dáýren Abaev, Syrtqy ister ministriniń birinshi orynbasary Aqan Rahmetýllin jáne Qostanai oblysynyń ákimi Arhimed Muhambetov atqarylǵan jumystar men aldaǵy kezeńge arnalǵan josparlary týraly baiandady.
Aǵartýshynyń Qostanai oblysyndaǵy týǵan jerinde ǵylymi-restavratsiia jumystary uiymdastyrylyp qana qoimai, birqatar áleýmettik jáne infraqurylymdyq jobalar iske asyrylyp jatqanyn erekshe aitý kerek.
Komissiia otyrysyn qorytyndylai kele, Memlekettik keńesshi Erlan Qarin Ahmet Baitursynulynyń 150 jyldyq mereitoiy aiasynda aldaǵy kezeńge josparlanǵan is-sharalardyń sapaly ótkizilýin qamtamasyz etýdi tapsyrdy.
