Foto: Janar Karimova, Vlast.kz
Almaty ákiminiń orynbasary Muhit Ázirbaev onlain brifing barysynda qaladaǵy qurylystarǵa qoiylatyn jańa talaptar týraly aityp berdi, dep habarlaidy QazAqparat.
Onyń aitýynsha, qurylystyń jańa erejeleri ótken jyly tarihi ortalyqtyń saqtalýyn eskere otyryp qabyldandy.
Olarǵa mektepterdi, balabaqshalardy jáne basqa da infraqurylymdy qadamdyq qoljetimdilikpen qamtamasyz etý boiynsha turǵyn úi keshenderin salýshylardyń mindettemesi de engizilgen.
«Abai dańyǵylynan joǵary ál-Farabi dańǵyly men Jandosov kóshesine deiingi, Shyǵys ainalma jolynan Sain kóshesine deiingi ýchaskelerdegi turǵyn úi ǵimarattarynyń biiktigi shekteledi», - dedi ol.
Turǵyn úi ǵimarattarynyń biiktigin shekteý sebepteriniń ishinde ákim orynbasary mynany atap ótti:
- qalanyń tabiǵi jaǵdailaryn da, sáýlettik dástúrlerin de eskermeitin turǵyn úi ǵimarattarynyń tipterin qoldana otyryp, jańa qurylysqa tán kelbettiń bolmaýy;
- burynnan bar sáýlet-landshaftyq kórikti jerlerdi saqtaý jáne anyqtaý qajettiligi;
- jaily keńistik qurý jáne qalyptastyrý;
- qalanyń taý etegindegi turǵyn úi qurylysynyń joǵary tyǵyzdyǵy;
- áleýmettik jáne kólik infraqurylymynyń talap etiletin deńgeiiniń bolmaýy;
- ártúrli jaǵdailarda, onyń ishinde qaýipsizdik bóliginde biik turǵyn úi ǵimarattaryn paidalanýǵa jáne olarǵa qyzmet kórsetýge qoiylatyn normativtik talaptardyń bolmaýy.
Osyǵan bailanysty kórsetilgen aýdandardaǵy ǵimarattar biiktiginiń shekti parametrlerin 5 jáne 9 qabattan aspaityn etip salý usynylady.
Sondai-aq, spiker eskirgen turǵyn úilerdi renovatsiialaý baǵdarlamasyn odan ári iske asyrý týraly aityp berdi.
«Menshik ieleriniń 100%-y jeke investordy tartýdy qoldaityn úilerdi qospaǵanda, eskirgen turǵyn úi qoryn biýdjet qarajaty esebinen renovatsiialaý baǵdarlamasyn odan ári iske asyrý boiynsha sheshim qabyldandy», - dep atap ótti ákim orynbasary.
Spikerdiń sózinshe, qazirgi ýaqytta qalada 1930-1975 jyldary salynǵan, paidalaný merzimi ótken 1427 eki qabatty úi bar, onda 60 myńnan astam adam turady.
6637 páterli 708 eski úidi buzý jáne 34 605 páterli 683 turǵyn úi salý josparda.
«Eski úilerdiń turǵyndary jańa turǵyn úi qoryna kóshiriledi, al buzylatyn turǵyn úi aýmaqtary qala muqtajyn qamtamasyz etý jáne jaily ortany qalyptastyrý úshin paidalanylady», - dep túsindirdi Muhit Ázirbaev.
