Almaty qalasyndaǵy S.J.Asfendiiarov atyndaǵy Qazaq ulttyq meditsina ýniversitetiniń jańa 9 qabatty jataqhanasy paidalanýǵa berildi. Elbasy Nursultan Ábishuly Nazarbaevtyń naýryz aiyndaǵy bes bastamasy boiynsha el igiligine berilgen alǵashqy stýdentter úiiniń biri ári biregeii.
Memleket basshysy usynǵan «Joǵary bilim alýdyń qoljetimdiligi men sapasyn arttyryp, stýdent jastardyń jataqhanadaǵy jaǵdaiyn jaqsartý» jaiyn "Nur otan" partiiasy óz baqylaýynda ustap keledi. Qazirgi tańda el óńirlerinde jańa jataqhanalar boi kóterip, aldaǵy jyldary stýdentterge beriledi. Almaty qalasynda ornalasqan 38 joǵary oqý ornynda shamamen 140 myńǵa jýyq stýdent oqidy. Onyń teń jartysynan astamy ózge óńirlerden kelgen jastar. Osy jastardyń jataqhanamen qamtamasyz etilýine Elbasynyń «Bes áleýmettik bastamasy» tyń serpin berip otyr. Aldaǵy úsh jylda Almatyda 22 myń oryndyq 37 jataqhana salynatyn bolady. Jergilikti bilik keibir ýniversitterge jer telimderin bólip, qurylys alańdaryna jylý, sý, elektr energiiasy sekildi injenerlik jelilerdi tartýǵa kómegin berýde. Al S.J. Asfendiiarov atyndaǵy Qazaq ulttyq meditsina ýniversitetiniń jańa jataqhanasy osynyń bir jemisi.
9 qabatty eki ǵimarattan turatyn jańa stýdentter úiiniń ashylý saltanatyna QR densaýlyq saqtaý ministri Eljan Birtanov arnaiy keldi. Ózi oqyǵan oqý ornyndaǵy stýdentterdi jańa qonystarymen quttyqtap, aq lebizin bildirdi. Bolashaq dárigerlerdi kórip sózin "qurmetti áriptester" dep te bastady.
- Qaiyrly kún, qurmetti áriptester! Osylai ataǵanym durys shyǵar. Sebebi sizder bolashaq dáriger mamansyzdar. Men de osy shańyraqta bilim alǵanmyn. Osy jataqhananyń ashylý saltanatyna kelgenime óte qýanyshtymyn.
Ózderińizge málim, bul jataqhana Elbasy Nursultan Ábishuly Nazarbaevtyń bes áleýmettik bastamasy negizinde iske qosyldy. Tek qana Almatyda ǵana emes, tek meditsina salasynda ǵana emes, basqa da joǵary bilim berý uiymdarynda da osyndai jobalar júzege asa bastady. Elbasy tapsyrmasy boiynsha júzege asyp jatqan jobalar bizdi qýantady. Ýniversitet basshylyǵyna alǵysymdy bildiremin.
Qazirgi tańda joǵary bilim berý sapasy kóterý asa mańyzdy maqsat. Halyqaralyq deńgeige jetý úshin stýdentterimizge bar jaǵdaidy jasaýymyz qajet. Tek jataqhanalar ǵana emes, ýniversitetterdiń infraqurylymyn damytý kerek. Alda taǵy jataqhanalardyń boi kóterý jaiyn qarastyryp, Elbasy baǵdarlamasynyń júzege asýyna kúsh salamyz, - dedi ministr.
Eljan Birtanov jańa stýdentter úiin aralap, bilim alýshylardyń kúndelikti ómirimen de tanysty. Bolashaq dárigerlermen aǵylshyn tilinde sóilesip, bilimderin tekserip te kórdi. Bólmelerdi, ashana, oqý zaldary, kitaphana men kompiýterlik kabinetterdi aralady. Jańa jataqhanaǵa qýana-qýana qonystanǵan stýdentter Memleket basshysy men ministrge alǵystaryn bildirdi.
- Memlekettiń stýdentterge jasap jatqan igi isteri mol. 2019 jyldy "Jastar" jyly dep ataýynyń ózi bizge zor qoldaý. Negizinen stýdentter tyńǵylyqty bilim alý úshin olarǵa áleýmettik jaǵdai jasalý kerek. Mine osyndai jataqhana ashylǵanǵa bizdiń qýanyshymyzda shek joq. Bizdiń ýniversitetimizdegi jataqhanaǵa muqtaj stýdentterdiń sany qysqardy, edáýir azaidy. Bul biz úshin bir jetistik. Stýdentter úiiniń árbir bólmesi jyly, jaryq, zamanaýi talaptarǵa sai salynǵan. Memleket basshysyna, sizderge jáne ýniversitet basshylyǵyna stýdentter atynan kóp-kóp raqmetimdi aitamyn, - dedi ýniversitettiń stýdenttik uiymynyń tóraiymy Qarlyǵash Jumanova.
"Prezidenttiń bes áleýmettik bastamasy" boiynsha paidalanýǵa berilgen jataqhana Qurmanǵazy kóshesi boiynda boi kótergen. Jańa stýdentter úiine 600-ge jýyq bilim alýshy qonystanady. Bul Elbasy úndeýi negizinde ashylǵan elimizdegi eń iri jataqhanalardyń biri.
Jańa stýdentter úiiniń ashylýy - S.J. Asfendiiarov atyndaǵy Qazaq ulttyq meditsina ýniversiteti úshin airyqsha qýanysh deýge bolady. Sebebi 6 000-ǵa jýyq stýdent bilim alatyn oqý ordasynda stýdentterge jatatyn oryn jetispeidi. Jańa ǵimarat bul máseleni túbegeili sheshpese de, ózge qaladan keletin asa muqtaj stýdentter úshin kóp kómek boldy.
Stýdentter úiinde 75 adamǵa arnalǵan ashana, kir jýatyn oryn, 30 adamǵa arnalǵan oqý zaly, shaǵyn kitaphana, internet bólmeler, demalys orny jáne meditsinalyq kómek kórsetý kabinetteri bar. Stýdentter jailylyǵy úshin bar jaǵdai jasalǵan. Jýynatyn oryndary bólme jandaryna ornalastyrylǵan.
Bul stýdentter úii - S.J.Asfendiiarov atyndaǵy Qazaq ulttyq meditsina ýniversitetiniń 8-shi jataqhanasy. Ári ishindegi eń irisi. Sondai-aq óz qarjysymen jataqhana salǵan elimizdegi alǵashqy oqý orny.
Elimizdegi stýdentter sany 500 myńǵa jýyq. Onyń ishinde 41 %-y ózge óńirlerde oqityn jastar. Ótken jyly 85 myńnan joǵary stýdent jataqhanaǵa zárý bolǵan. Onyń jartysynan kópshiligi memlekettik joǵary oqý oryndarynda bilim alýshylar. Naqtyraq aitsaq, jataqhanada oryndardyń jetispeý Almatydaǵy oqý oryndarynda kóp baiqalady. Jyl saiyn stýdentter sany óskenmen, jataqhanalar boi kótermegen. Al kóp stýdentter úii Keńes kezinen qalǵan. Birazynyń tozyǵy jetip, kúdeli jóndeýdi de talap etedi. Bul áleýmettik máseleni basty nazarǵa alǵan Memleket basshysy bes bastamasy boiynsha airyqsha tapsyrma berdi. Nátijesinde jarty jyldan astam ýaqyt ishinde-aq oń nátijesin bere bastady.
