Foto: pexels.com
Asa iri alaiaqtyq jasady degen kúdikti Reseiden ekstraditsiialandy, - dep habarlaidy Ult.kz Bas prokýratýra málimetine silteme jasap.
Qazaqstan Respýblikasynyń Bas prokýratýrasy Resei Federatsiiasynan asa iri mólsherde alaiaqtyq jasaǵany úshin qylmystyq jaýapkershilikke tartý úshin Ózbekstan azamatyn ekstraditsiialady.
"Kúdikti 2005-2007 jyldar aralyǵynda Almaty qalasyndaǵy qurylys kompaniiasynda býhgalter bolyp jumys istei otyryp, úlestik qurylysqa qatysýshylardan aqsha qabyldaýdy júzege asyrǵan, turǵyn úi kesheniniń aiaqtalmaǵan qurylys obektisi boiynsha kiris kassalyq orderlerine býhgalterlik esepte kórsetilmegen jalǵan túbirtekter jazǵan.
Onyń jáne qylmystyń basqa da qatysýshylarynyń áreketteri saldarynan Almaty qalasynyń 80-nen astam turǵyny zardap shekti, olarǵa 3,7 milliard teńgeden astam shyǵyn keltirildi", - delingen habarlamada.
Qylmysqa qatysýshylardyń biri sottalǵan, alaida ol qylmys jasaǵannan keiin jasyrynǵan, sondyqtan oǵan halyqaralyq izdeý jariialandy.
"Byltyr jeltoqsanda izdeýde júrgen adam Resei Federatsiiasynyń Krasnodar ólkesinde ustaldy, sodan keiin Qazaqstan Respýblikasy Bas prokýratýrasynyń suraý salýy boiynsha Qazaqstanǵa ekstraditsiialandy", - delingen habarlamada.
Qazirgi ýaqytta kúdikti tergeý izoliatoryna qamalǵan.
Qylmys jasaǵany úshin múlki tárkilenip, bes jyldan on jylǵa deiingi merzimge bas bostandyǵynan aiyrý jazasy qarastyrylǵan.
