Almatyda Qazaqstan baspasóz klýbynda Naýryzbai aýdandyq «Baqytty otbasy» áleýmettik ortalyǵy jyl boiy atqarǵan jumystaryn qorytyndylady, dep habarlaidy QazAqparat.
Byltyr 4 ai ishinde ortalyqqa 1246 adam tirkelgen. 11789 qyzmet kórsetilgen.
Sondai-aq, «Atameken» UKP arqyly 78 ata-ana bilim alyp, qaitarymsyz grantqa ie bolyp kishigirim kásibin dóńgelete bastady.
«Ortalyqtyń jumysy barysynda kópbalaly jáne az qamtylǵan otbasylardyń ár múshesi tap bolatyn naqty ómirlik qiyndyqtaryn kórdik. Bul bizdiń ortalyqtyń Naýryzbai aýdany men jalpy qalanyń barlyq memlekettik qurylymdarymen belsendi jáne ózara árekettesýine yqpal etti. Mundai otbasylardyń kóptegen máseleleri jalpy psihologiialyq zańdyq jáne áleýmettik saýatsyzdyqtardan týyndaidy. Sondyqtan 2019 jyl «Baqytty otbasy» ortalyǵynyń jumysy muqtaj adamdarǵa der kezinde kómek berýdiń qanshalyqty mańyzdy ekendigin kórsetti. Biz osy joba arqyly adamdardyń ómirin ózgertýge bolatynyn túsindik», - dedi ortalyq jetekshisi Sana Jandai.
Onyń aitýynsha, byltyr 78 áiel óz kásibin bastaý úshin qaitarymsyz grant alǵan.
«Olarǵa 202 AEK mólsherinde, iaǵni árqaisysyna 505 myń teńge kóleminde qaitarymsyz grant berildi. Bul qarajat az bolsa da shaǵyn startap bastaýǵa kóp kómegin tigizedi. Áielderdiń kópshiligi saýda, biýti sala, aspazdyq, tigin biznesi boiynsha kásibin ashyp jatyr», - dedi Sana Jandai.
Atalǵan ortalyqtyń úilestirýshisi Naǵigúl Beisembina ortalyqqa kóbinese ózine ózi senimsiz adamdar keletinin aitty.
«Eń aldymen ortalyq arqyly bilim alǵysy keletin adamdar iriktelip, arnaiy tegin kýrstarda oqytylady. Alǵashynda osyndai oqytýǵa biz adamdardy ákele almaǵanbyz. Sebebi, jalǵyzbasty, kópbalaly analar qaraiyp qalǵan, qalanyń qainaǵan tirliginen qol úzip qalǵan. Bizge kelgende senimsiz bolyp keledi. Bizdiń jan-jaqty kómegimiz olardy óz kásibin bastaýǵa qanattandyrady. Qazir jazylyp qoiǵan adam sany kóp», - dedi N. Beisembina.
