Almatyda SSSR-dyń qyzyl pasportymen júrgen 71 turǵynǵa jańa qujat berildi, dep habarlaidy "Ult aqparat".
Almaty kóshi-qon qyzmetiniń málimetinshe, jyl basynan beri Almaty qalasynda 1974 jylǵy úlgidegi burynǵy SSSR pasporty negizinde 71 adamǵa Qazaqstan Respýblikasy azamatynyń jeke basyn kýálandyratyn qujat berildi.
«Úkimettiń 2013 jylǵy 26 tamyzdaǵy № 852 qaýlysynyń, «Qazaqstan Respýblikasy azamatynyń pasportyn, Qazaqstan Respýblikasy azamatynyń jeke kýáligin, Qazaqstan Respýblikasynda sheteldiktiń turýǵa yqtiiar hatyn, jeke kýálikterin, azamattyǵy joqtar jáne bosqyndardy tirkeý, berý, aýystyrý, tapsyrý, alyp qoiý jáne joiý erejesin bekitý týraly» talaptaryna sáikes, 1974 jylǵy úlgidegi pasport negizinde alǵash ret jeke kýálik alǵan azamattar Qazaqstan Respýblikasy azamatynyń jeke basyn kýálandyratyn qujattarǵa, olardyń, Qazaqstan Respýblikasynyń azamattyǵyna jatatynyn 13-pishin boiynsha Almaty qalalyq PD Kóshi-qon basqarmasy Azamattyq jáne immigratsiia bólimi anyqtama berý arqyly rastaǵannan keiin nemese Qazaqstan Respýblikasynyń aýmaǵynda týǵandardyń jáne turaqty negizde turatyn azamattarǵa beriledi», – dedi Almaty qalalyq PD kóshi-qon qyzmeti basqarmasynyń bastyǵy Ashat Bútinshinov.
Qujat alǵandardyń arasynda 54 jastaǵy Asylbek Omarbekov te bar. 24 qyrkúiekte ol Qazaqstan Respýblikasy azamatynyń jeke kýáligin aldy. Er adam densaýlyǵyna bailanysty kórsetilgen qujatty ýaqytynda rásimdei almaǵan. Sol sebepti, osy ýaqytqa deiin eski qujatpen júrgen.
