Almaty ákimi Baqytjan Saǵyntaev jańa oqý jylyna daiyndyq máselesi týraly aitty, dep habarlaidy QazAqparat.
«Halyqtyń qarqyndy kóship-qonýy men balalardyń týý deńgeiiniń ulǵaiýyna orai Almatyda oqýshylar sany jyl saiyn orta eseppen 12 myńǵa artyp otyr. Byltyrǵy oqý jylynda oqýshylardyń jalpy sany 17 myńnan astam balaǵa ósti. Búgingi tańda 30 myń oqýshyǵa oryn tapshy. Sondyqtan byltyr mektep qurylystaryn jedeldetý qarqyndy júrgizildi. Biyl 1 qyrkúiekte Áýezov jáne Túrksib aýdandarynda 1800 oryndy eki jańa mektep ashylady. Sonymen qatar, qala mektepteriniń janynan 3642 oryndy segiz qosalqy ǵimarat salynyp jatyr. Bulardan bólek, «Jumyspen qamtýdyń Jol kartasy - 2020» baǵdarlamasy boiynsha 13 200 oryndy toǵyz mektep, mektepter janynan 6550 oryndy 13 qosalqy ǵimarat salý josparlanǵan. Memlekettik-jekelik áriptestik aiasynda 5700 oryndy bes mektep salý usynyldy. Osylaisha, 2021 jyldyń sońyna deiin oqýshy ornynyń tapshylyǵy 83%-ke qysqaratyn bolady», - dedi B. Saǵyntaev «Almaty» telearnasynyń tikelei efirinde.
Almaty ákimi koronavirýs infektsiiasynyń indetine bailanysty balalar men muǵalimderdiń densaýlyǵyn saqtaý maqsatynda QR BǴM epidemiologiialyq ahýal jaqsarǵanǵa deiin qashyqtan oqytý týraly sheshim qabyldaǵanyn eske saldy.
Burynǵy oqý formatyna kezeń boiynsha kóshý josparlanǵan. Shtatty rejimge birinshi kezeńde 1-5 synyp oqýshylary, ekinshi kezeńde 6-11 synyp oqýshylary kóshedi ári sanitarlyq qaýipsizdiktiń pármendi sharalary qamtamasyz etiletin bolady.
B. Saǵyntaev birinshi kezekte az qamtylǵan otbasylar balalaryn kompiýterlik tehnikamen qamtamasyz etýge erekshe kóńil bólinetinin aitty.
Júrgizilgen monitoring nátijesi boiynsha 70 myńnan astam adamǵa, onyń ishinde oqýshylar men muǵalimderge kompiýterler men noýtbýktar beriletin bolady.
«Budan ózge, internetke qoljetkizý jáne mobildi bailanys nashar aimaqtarǵa monitoring júrgizildi. Uialy bailanys operatorlary ornatatyn qosymsha taratýshy antennalardyń orny anyqtaldy», - dedi Almaty ákimi.
