Almatyda 3 operator pilottyq rejimde 5G jelisin qosty. Bul týraly qalalyq tsifrlandyrý basqarmasynyń basshysy Baian Qońyrbaev brifing barysynda málim etti, dep habarlaidy QazAqparat.
Spikerdiń sózinshe, 5G jelisin elimizde qyzmet kórsetetin 3 operator adamdar kóp jinalatyn jerge ornatty.
«Qazir Kóktóbe, Shymbulaq, Medeý, Kaýsar-Plaza jáne Smart-Point núktesinde pilottyq rejimde 5G jeli iske qosyldy. Tehnologiianyń óte jyldam damýyna bailanysty biz osy 5G jelisine basymdyq berip otyrmyz. Óitkeni ol az ýaqyttyń ishinde anaǵurlym kóp maǵlumatty bere alady. Sonymen qatar, bul jeli keshki ýaqytta telefonnan serial kórýge, jaqyndarymyzben video arqyly sóilesýge múmkindik beredi»,- dedi Baian Qońyrbaev.
Sonymen qatar, ol 5G jelisin qosýda qalaǵa eshqandai shyǵyn kelmeitinin atap ótti. Ony operatorlar ózderi ornatyp jatyr.
