Foto: Almaty ákimdigi
Almatyda ekologtar №3 avtobýs parkin tekserý barysynda ondaǵan zańbuzýshylyqty anyqtap, milliondaǵan aiyppul saldy. Bul týraly qalalyq ákimdik habarlady.
Tekserý kezinde parkte tirkelgen 289 avtobýstyń 249-y qaralyp, olardyń 50-inde katalizator joq ekeni belgili boldy. Katalizator — ziiandy shyǵaryndylardy azaitatyn mańyzdy qurylǵy.
Ekologtar mundai jaǵdaidyń alǵash ret tirkelip otyrmaǵanyn atap ótti. Buǵan deiin NEO City TRANS jáne TALAP T avtobýs parkterinde de tekseris júrgizilip, keibir kólikterden ziiandy qaldyqtardyń normadan asqany anyqtalǵan.
Anyqtalǵan zańbuzýshylyqtar boiynsha ákimshilik hattamalar toltyrylyp, jalpy somasy 13,3 mln teńge aiyppul salyndy. Sonymen qatar, kemshilikterdi joiý týraly nusqama berildi.
