© AP Photo / Jean-Francois Badias
Almatyda úiiniń aýlasynda bes adamdy atyp óltirgen Igor Dýjnovqa qatysty sot úkimi shyqty, dep habarlaidy Sputnik Qazaqstan.
Qalalyq sottyń sýdiasy Erkin Maishinovtyń úkimimen Igor Dýjnov ómir boiyna bas bostandyǵynan aiyryldy, ol jazasyn tótenshe qaýipsizdik qylmystyq-atqarý júiesi mekemesinde óteidi.
Igor Dýjnov Qylmystyq kodekstiń birneshe baby boiynsha kináli dep tanyldy:
172-bap – "sheteldik qarýly qaqtyǵystarǵa qatysý" – 4 jyl 8 aiǵa bas bostandyǵynan aiyrý;
430-bap 1-bóligi – "sot úkimin, sot sheshimin nemese ózge de sot aktisin ne atqarý qujatty oryndamaý" – 1 jyl 6 ai bas bostandyǵynan aiyrý;
408-bap – "Sot tóreligin nemese sotqa deiingi tergep-tekserýdi júzege asyratyn adamnyń ómirine qol suǵý" – ómir boiy bas bostandyǵynan aiyrý;
99-bap 2-bóligi 1 jáne 6-tarmaqtar – "basqa adamdardyń ómirine qaýipti tásilmen jasalǵan eki jáne odan da kóp adamdy óltirý" – ómir boiy bas bostandyǵynan aiyrý;
24-bap 3-bóligi ("qylmysqa daiyndalý jáne qylmysqa oqtalý) jáne 99-bólim 2-bóligi 1 jáne 6 tarmaqtar ("basqa adamdardyń ómiri úshin qaýipti tásilmen jasalǵan eki jáne odan da kóp adamdy óltirý") – ómir boiy bas bostandyǵynan aiyrý;
380-bap – "Bilik ókiline qatysty kúsh qoldaný" – ómir boiy bas bostandyǵynan aiyrý.
"Qazaqstan Respýblikasynyń Qylmystyq kodeksiniń 58-baby 4-bóligin qoldanyp, qylmystardyń jiyntyǵy boiynsha Igor Ivanovich Dýjnovqa ómir boiy bas bostandyǵynan aiyrý túrindegi jazany tótenshe qaýipsizdik túzeý mekemesinde óteý taǵaiyndalsyn", - dedi sýdia Maishinov.
Bes adamnyń ólimi
2021 jyldyń 20 qyrkúiegi keshke Almaty turǵyny Igor Dýjnov otbasyn úiden shyǵarýǵa kelgen adamdarǵa oq atty. Bes adam qaitys boldy: eki politsei, bir sot oryndaýshysy, úidiń jańa iesi men onyń ókili.
Kúdiktiniń otbasyna tiesili turǵyn úi onyń aldynda bankke qaryz boiynsha úshinshi tarapqa satylǵan. Úidiń burynǵy iesi sot sheshimimen kelispei, úidi bosatqysy kelmegen.
Sotta Dýjnov adamdardyń ólimine bailanysty ókinetinin aitty. Ol mundai jaǵdaiǵa "zańsyzdyq pen sot ozbyrlyǵy, sot oryndaýshysynyń zańsyz áreketteri" sebep bolǵanyn aitty.
Buǵan deiin aldyn ala sot otyrysynda bas prokýratýra Dýjnov qylmysty josparlaǵan, ol karabindi oqtap, garajǵa jasyrǵan dep málimdedi.
Bas prokýratýranyń qylmystyq qýdalaý qyzmetiniń aǵa prokýrory Shyńǵyshan Pusyrmanovtyń aitýynsha, sot oryndaýshysy, úidiń jańa iesi, advokattyń kómekshisi aýlaǵa kirgen kezde Dýjnov qarýyn alýǵa barǵan.
Tergeý Dýjnovtyń aýlasyna kirgen adamdardy qabyrǵaǵa qaz-qatar turǵyzyp, birinen soń birin atqanyn anyqtady. Sodan keiin ol kóshege shyǵyp, sol jerde turǵan politsiia qyzmetkerlerine oq jaýdyrǵan. Biraq olar kóliktiń artyna jasyrynyp úlgergen, olardyń biri oq jaýdyrǵan adamnyń qarýyn tartyp aldy.
Jalpy alǵanda Dýjnov karabinnen 10 ret oq atqan, onyń ishinde toǵyzyn segiz sekýndta atty.
Dýjnov sottaǵy sońǵy sózinde bes adamnyń ólimine kináli ekenin moiyndamady, jasaǵan isine ókinbedi.
