Almatylyq dárigerler 40 jastaǵy er adamnyń bas miyna joǵary tehnologiialyq operatsiia jasady, dep habarlaidy QazAqparat.
Ortalyq qalalyq klinikalyq aýrýhananyń málimetinshe, nevrologiia qabyldaý bólimshesine mi qanainalymynyń jiti buzýshylyǵy kúdigimen 1981 jyly týǵan patsient kelip tústi.
Naýqasty aýrýhananyń neirohirýrgi tekserilip, angiografiia KT júrgizdi. Nátijiesinde, aldyńǵy qosylǵan kúre tamyrynyń úzilgen anevrizmasy anyqtaldy.
Shuǵyl túrde neirohirýrg-dáriger Erbol Makejanov joǵary tehnologiialyq operatsiia jasady. Iaǵni qapty anevrizmanyń assistentsiia ballonymen endovaskýliarly embolizatsiia júrgizdi.
Dárigerdiń aitýynsha, endovaskýliar neirohirýrgiianyń zamanaýi tehnologiialary bul operatsiialardy bas súiekti tespei jasaý múmkindigin beredi.
«Jambas kúre tamyry arqyly búkil aǵzasy boiynsha arnaiy kateter salynyp, anevrizmaǵa enemiz de onda arnaiy spiraldardy ornatamyz, sodan soń anevrizma qan aǵymynan jansyzdanyp osylaisha qan quiylý qaýpiniń aldy alynady. Operatsiia sátti ótti. Patsient reanimatsiia bólimshesinde oianǵannan soń aýrýǵa shaǵymdanǵan joq. Burynnan mazasyn alǵan bas saqinasynyń aýrýy tolyǵymen joiylyp, 10-shy táýlikte patsient aýrýhanadan shyǵaryldy» - dedi Erbol Makejanov.
Sonymen qatar, ol anevrizmanyń úzilýi gemorragiialyq insýlt, júike júiesiniń zaqymdanýy nemese bas miyna qan ketýge deiin aparatynyn atap ótti.
