Sýret: freepik
Qazaqstan Joǵary oqý oryndary qaýymdastyǵynyń prezidenti Rahman Alshanov búgin elordada ótken «Ýniversitetterdiń jańa modeli» atty ulttyq rektorlar mektebiniń jiynynda Almaty hostelindegi órt týraly pikir bildirdi, dep habarlaidy Kazinform.
«Ótkende úlken jinalysta da aittym. Qarasańyz, Nazarbaev Ýniversitetiniń biýdjetin buǵan deiin eshkim bilgen joq. Ótkende aitylyp qaldy. Bir ǵana sol ýniversitettiń biýdjeti Qazaqstandaǵy búkil ýniversitetterdiń qarajatynan artyq bop tur. Árine, joǵary bilimdi damytý kerek boldy. Biraq qashanǵy osylai bola beredi?! Búgingi tańda memleket áli olarǵa biýdjetten kómektesip otyr. Sonda ketken aqshanyń jartysyn únemdeitin bolsa, qalai bolar edi? Olardyń ýáji bar, Garvardta qanshama balany oqytqansha óz elimizde sol jaqtyń ǵalymdaryn shaqyrtyp oqytamyz, sol arqyly aqsha únemdeimiz degendi aitady. Nazarbaev Ýniversitetiniń biýdjetin bir stýdentke shaqqan kezde 240 myń dollar eken. Al Garvardta 40 myń dollar ǵana. Bizde 6 ese joǵary. Sonda biz Garvardtan 6 ese kóp maman daiyndap jatyrmyz ba? Aqshanyń bári qaida ketip jatyr? Tekseretin organdar sony teksersin», – deidi ǵalym.
Onyń aitýynsha, bir jataqhana salýǵa 2 mlrd teńge ketedi.
«Nazarbaev Ýniversitetiniń jyldyq biýdjetiniń jartysyn únemdeitin bolsa, 100 jataqhana salýǵa bolatyn edi. Al 100 jataqhana degen - 5 myń stýdenttiń panasy. Sonda keshegi hosteldegidei oqiǵa bolmaityn edi. Almatyda qazir 40 myń bala dalada júr. Amalsyzdan hostelge barady. «Kerek, kerek», - dep sanitariialyq normany, talaptardy tómendettik. Sonyń saldarynan osyndai jaǵdai boldy», – dedi qaýymdastyq prezidenti.
